Rozerîn Gultekîn

 

STENBOL - Verfeka Meclîsê Cinîyan ê DEM Partî ya Stenbolî Pinar Kamîle Kandal derheqê xebatanê meclîsê cinîyan ê Stenbolî de qisey kerd û da zanayîş ke semedê vengdayîşê Rayberê Şarê Kurdî Abdullah Ocalanî do vajê û xebatê rêxistinkerde bikerê. Pinar Kamîle Kandal va, do cinî bibê cewabê vengdayîşê Abdullah Ocalanî.

 

Meclîsê Cinîyan ê Partîya Têduştî û Demokrasî (DEM Partî) semedê vengdayîşê Rayberê Şarê Kurdî Abdullah Ocalanî qal bikerê û xebatê rêxistinkerde bikerê, xebatanê xo dewam kenê. Stenbol de serdayîşê keyeyan yeno kerdiç, pêvînayîşê cinîyan yenê kerdiş. 

 

Verfeka Meclîsê Cinîyan ê DEM Partî ya Stenbolî Pinar Kamîle Kandal derheqê xebatan de qisey kerd.

 

‘Lazimîyê vengdayîşî çi bo ma do ca bîyarê’

 

Pinar Kamîle Kandal da zanayîş ke xebatê rêxistinkerde lez kerdê û va: “Vengdayîşê Birêz Ocalanî ma kelecanî kerd û ma tewrê prosesî bî. Ma hem sewîyeya merkezî, hem qezayan de xebatan kenê û nê prosesî de ca gênê. Ma zanê ke rol keweno ma ser. Vengdayîş, mesaj û kitabê Abdullah Ocalanî de muhîmîya semedê azadîya cinîyan yeno qalkerdiş, rêxistinbîyayîş yeno qalkerdiş. Ma nê hetî de berpirsyarîyê xo bica anê.”

 

‘Xêrcê têkoşînê cinîyan ê rêxistinkerde vurnayîş zehmet o’

 

Pinar Kamîle Kandal wina dewam kerd: “Ma sey meclîsê cinîyan, qerarê pêvînayîşê cinîyan girewt. Na çarçewa de ma pêvînayîşê xo kenê. Ma bi rojnameger, rêxistin, kom û bawerîyê cîya yê cinîyan dir yenê têhet. Ma do nê xebatan dewam bikerê. Ma do keye, kuçe û kargeriyanê xo biresnê cinîyan. Cinî awankerdişê komelî de kesayetê ewilî yê. Bê têkoşînê cinîyan, vurnayîş zehmet o.”

 

‘Bawerîya ke Birêz Ocalan daya tam a’

 

Pinar Kamîle Kandal tewr peyîn wina va: “Pêvînayîşê  ma, kombîyayîşabê ma de derheqê prosesî de tabloyêk vejîya werte. Bawerîya şarî ya bi DEM Partî û Birêz Ocalanî tam a. Şar bi sîstemî bawer nêkeno. Ma hewl danê ke heta destê ma ra yeno, ma bibê cewabê pers û endîşeyan. Ma do heta 30ê nîsane keye bi keye bigeyrê û xebatanê xo dewam bikerê. Ma biresê serkewtiş do na herre ser o, nameyê  demokrasî ser o xeylêk çî bivuryê. Cinî do bibê cewabê Birêz Ocalanî.”