ÎZMÎR - Cinîyê karkerê ramitişî ke bêasayîş xebityenê û keda înan nîna vînayîş, dîyar kerdî ke ganî keda înan bêro vînayîş û wa êdî milê cinîyan ser o nêbê bar.

 

Goreyê dayeyê Sazgehê Îstatîstîkê Tirkîya (TUÎK) sektorê ramitişî de nêzdîyê 5,5 mîlyon karkerî şuxilênê la nê dayeyî de karkerê mewsimî yê ramitişî û multecî çin ê. Raporê 2023ine yê Wezaretê Asayîş Xebate û Komelî de hûmara karkerê ramitişî yê mewsimî nêzdîyê mîlyonêk yeno dîyarkerdiş, la yeno texmînkerdiş ke no 4 hezarî ra zêdeyêr o. Mîyanê dayeyan de derheqê cinî û tutan de çîyêk çin o la Tirkîya de cinîyê ke erdî ser o şuxilênê se ra 96ê înan bêqeyd şuxilênê.

 

‘Erd aîdê keyeyî yo la nêeşkenê debare bikerê’

 

Karkera ramitişî Ayşe Çerî ke 30 serrî verê Mêrdîn ra semedê sebebê ekonomî koçê Îzmîrî kerda, dîyar kerd ke debara xo serayê ke aydê înan o kenê. Ayşe Çerî wina va: “Şîyayeyî zaf vay ê. Derman, mazotî, toxum vay ê. Ma xeylê xo xiyar û marul çînenê. Ma aşma wisarî de dest pêkenê, heta zimistanî dewam kenê. Zimistanî semedê debera ma nêbena ma şinê karê kesê bînan. 4 tutê mi est ê. Şîyayeyî zaf zêde yê.”

 

‘Ma têduştî wazenê’ 

 

Ayşe Çerîn wina va: “Her karî rê cinî berpirsîyar ê. Keye ra heta teber. Serê sibayî 5.00’ine de wurzenê heta 13.00ine şuxilênê. Ma keye de zî kar kenê. Wa êdî barê cinîyan şenik bo. Serayan de karkerê cinî hîna zêde yê. Aşme de meaşê ma qasê asgarî yo. Karê ma giran o. Hamnanî tutê ma zî hetkarî danê ma. Ma karêk biasayîş, adîlane, kreş û saetê kêmî yê xebate wazenê. Ma zî sey camêrdan karêk asayîş û bi sîgorte wazenê. Ganî nê îmkanî bibê.”

 

‘Ganî karê cinîyan bêro şenikkerdiş’

 

Gulîstan Çerî zî va, roja ke zewiciyaya û heta nika 20 serrî yo şuxilêna û wina va: “Cinî tena erdan ser o nêşuxilênê. Keye de zî şuxilênê. Pêro bar milê cinîyan ser o. Ganî no bar bêro şenikkerdiş. Camêrdî keye de nişnenê ro û paweyû werd û çaya xo yê. Her çi cinî kenê. Ganî camêrdî bibê wayîrê hişmendî û bibê hetkarê cinîyan. Cinî alîkarê bêqeyd û bêsîgorte şuxilênê. Ganî têduştî bibo. Ganî cinî nêrê pelçiqnayîş. Ganî dewlete nê çareser bikero.”

 

‘Xeyal û şert û mercê zehmetî’

 

Bahar Çerîya 17 serrî ke fek mektebî ra veradaya û seraya keyeyê xo de şuxilêna wina va: “Ma serê sibayî ra wurzenê. Ez cuyêka baş wazena. Ez nêşina mekteb. Semedo ke şertî zehmet ê. Ez keyeyê xo rê bena hetkar. Xeyalê her kesî est ê. Badê cayêk merdimî êdî xeyalan zî nêkenê. La wa her kes pey xeyalanê xo şêro.”