Neslîhan Kardaş

 

BÊDLÎS - Endama Meclîsê Mayanê Aştîye Guler Coşkun ke demê şerî de domananê xo vînî kerd, îfade kerd ke ganî gamê hîna lez bêrê eştene seba ke aştî bibo û va, “Destê aştiye yê Rayberê Şarê Kurdî Abdullah Ocalanî derg kerd, ganî vengî de nêmano.”

 

Guler Coşkun ke qezaya Tetwanî ya Bedlîsî ra ya û serrê dergan seba aştîye têkoşîn kena, nê têkoşînî de xeylê zehmetîyan ant la hema zî têkoşînê xo ra fek vera nêdaya û demê şerî de domanê xo vînî kerd. Guler Coşkun lajê xo hêrişêko hewayî de vînî kerd û tena yew hetê lingê ey sey cenaze girewte û defin kerd. Pêro dejê ke antê zî Guler Coşkun hema zî waştişê xo yê seba aştîye ser o israr kena.

 

Maya aştîye Guler Coşkun hîkayeya domanê xo yê vînîbîyaye Cahit Coşkun (Ferzat Sedar) qal kerd û waştişê xo yê aştiye ma rê îfade kerd.

 

‘Semedê ma xeylêk kede da’

 

Guler Coşkun dîyar kerd ke ê serranê 1990î de sebebê şertanê ekonomî Tetwan ra koç kerdî Stenbol û lajê aye Cahit Coşkun ke demê şerî de dinyaya xo bedelnaye, o wext sinifa 4ine de bîyo. Cahit Coşkun o wext seba rewşa xirab a ekonomî ya keyeyî sey pakkerê solan xebityayîne û Guler Coşkun va: “Her şewe wexto ke ameyîne keye, pereyê ke qezenc kerdibî dayîne. Lajê mi qet heqê yewî nêwerdêne. Ê seba debara keyeyî xeylê karê cîya kerdî. Ê xeylêk kede da. O ewnîya ma ra, ma wey kerd. Mayî û babî hende kede nêdayê.”

 

‘Lajê mi nuştox bi’

 

Guler Coşkun dîyar kerd ke ê demêk agêrayê Tetwan û va: “O hem siyaset reyde eleqedar bîne, hem zî kar kerdêne. Lajê mi nuştox bî, kitabî nuştêne. Ey kitab de babîyê xo ser çîyêk nuştibî. Mi rojêke ey ra pers kerd; ‘ti çira mi ser o çîyêk nênusenê?’ Roja bîn nuştib û ard mojna mi. Babîyê ey dima ra koçê peynî kerd. Hişê lajê mi timî karê ey sîyasî ser o bî. O her tim polîsan dir rî bi rî mendêne. Wexto ke mi vatêne, baldar be, hêrs bîne.”

 

‘Xêrê têkoşînî înan ma lingan ser o vindenê’

 

Guler Coşkun va ke rojêke Cahit aye ra vato ke o qerar dayo tewrê PKKyî bibo la va "wexto ke ti yena vîrê mi nêşêna şêrî" û badê nê vatişî mi xo zaf xirab hîs kerd. Dimayê demêk, ey hewl da ke ez zêde ci ra  hes nêkerî ke demo ke o şêro zêde xemgîn nêbî. xebate. Ez fikrîyena ke o do demêk bimano û agêro, la hîrê rojî dima badê ke şi, ez musaya ke tewrê PKK’yî bîyo. Tena lajê mi nêşî, tutê hemîne şî. Ma sereyê xo berz gênê. Ma eşkenê xêrê têkoşînê înan pay ra vinderê. Pêro dinya qalê têkoşînê gerîla kena. Ma bi xêrê Birêz Abdullah Ocalanî û tepişteyanê sîyasîyan est ê.”

 

Hewnê dayîkêke

 

Guler Coşkune va, roja ke lajê aye dinyaya xo bedelnayo, aye ey hewnê xo de dîyo û va: "Ez şewa 21ê hezîrane 2021î de keye de kewtêne ra. Hewnê xo de mi dî ke ez û lajê mi şikeftêke de yê. Corê ma de darê zaf weşikî estbî. Ma her di zî zaf keyfweş bî. Badê teqayîşêk virazîya. Bi teyareyan bomba eştêne ma ser. Nê vengî reyde destê lajê mi destê mi ra vecîya. Koyî û kerrayî parçe parçe bîyî. Pêro darê girdî wuşk bîyî. Ez uca menda û lajê mi vînî bî. Badê cû ez bi tersêko gird hewnî ra werzîya. Kênaya mi persa se bî, mi aye rê nêvat. Mi şî hewnê xo awe rê vat ke hewnê mi awe reyde biherikîyo. Vejîya werte ke lajê mi a şewe şehîd bîyo."

 

‘Mi cenazeya tutê xo tena lingêk ci dî’

 

Guler Coşkun îfade kerd ke lajê aye Cahit Coşkun seba zanayîşê çareserîya di hevalanê xo yê ke 21ê hezîranî de dinyaya xo bedelnayê de şîyo û va: “Ê rayîrî ser o raştê şiwanêk ameyê û înan ey ra nan waşto. Şiwanî vato ke çîyêk ey çin o biwero û şiwanî vato, "tîya vindere, ez do çîyêk bîyarî û agêrî." Dimayê demêk kilm înan leşkeran ra cayê lajê min û hevalanê ey vato û teyareyan hêroş kerdo. Tena ez eşkeya lingêk ci bîyarî. Mi a linge hewnê xo de dîbî.  Ê şiwanî înan îxbar kerd. Cenazeya lajê mi hirê aşmî goristanê bêkesan de mende. Badê ke mi zana lajê mi şehîd bî, testê gonî ame waştiş û nimûneyê DNAyî ame girewtiş. Peynîya hirê aşman de mi şî û cenazeyê lajê xo girewt."

 

‘Semedo ke ma kurd ê ma ra vanê terorîst’

 

Guler Coşkun bale ante rastîya ke verê cû dewlete ra zaf tersayêne û va: "Ma ra vatêne terorîst, la ne ma û ne zî domanê ma terorîst ê. Pêro domanê ma yê ke beşdarê têkoşînî bîyî zaf zîrek bîyî. Ganî merdimê her miletan, taybet mayî bifikrîyê gelo çira şarê kurdî serewedaritiş kenê. Eke ê terorîst bîyêne, bêşik do biqedîyayêne. Seba ney ê çîyêk zanenê. Fikrêk wina ma ser awan bî ke wexto ma Stenbol de bî, yew cîranêke ma Ordu ra, ma ra persa; gelo cayê ma de terorîstî est ê û va, ma înan ra tersenê. Mi ey ra persa 'Ti mi ra tersenê?' û ey va 'Nê, çira ez to ra bitersî?' Û mi ey rê vat, 'Mi ra vanê terorîst.' Seba ke ma kurd ê, ma ra vanê terorîst. Mi ey rê vat ke ganî o biperso çira domanê ma şîyî. Eke îşkence ma rê nêameybî kerdene û dewê ma nêameyîne veşnayene, domanê ma zî serewedaritiş nêkerdêne."

 

‘Ma kurd ê û Kurdistan ra yê’

 

Guler Coşkun îfade kerd ke şarê kurdî bi hezaran serrî yo ke erdê xo ser ciwîyenê û şarê kurdî koçber nîyo, cayêko bîn ra nêameyo. Guler Coşkun va, "Ma kurd ê û Kurdistanî ra yê. Heta ke tena yew kurdêk bimîano zî têkoşîna ma yê seba azadî û aştiye do her dewam biko. Ganî her kes vindero û bifkrîyo û vajo 'êdî bes o'. Çira no şer nêqedîyeno? Kurdî ziwan û nasnameyê xo wazenê. Çîyêko bîn nêwazenê. Eke çareserîyêko bîn nêro vînayene, şer do hîna xidar bibo û şerê dinya yê hirîne do dest pê biko. La eke aştî bibo, pêro şerî do biqedîyê. Ma bedelanê girdan dayî, la nika ma vanê 'aştî'. Wa êdî kes nêmiro. Eke mayêka tirke yew rey ma rê veng bido, ma seba aştîye destanê xo bidê yewbînan, bi hezaran mayanê kurdan do şêrê. Bêrê ma mil bi mil vinderê û pîya aştî bîyarê dinya. Sey mayanê aştîye ma şew û roje xebitenê. Zaf ray copan dayî ma ro û ma rastê gazê îsotî eştî ma, la reyna zî ma fek aştîye ra vera nêdayî."  

 

‘Ganî destê aştîye yê Abdullah Ocalanî veng nêmano’

 

Guler Coşkun peynî de va: "Ganî ma aştî misoger bikê. Dewlete zî seba prosesê ke nika dest pêkerd waştişêk kerd û înan proses dest pêkerd. Seba nê sebeban ganî gamî hîna lez bêrê girewtiş. Ma do heta peynîye gonîya xo nê rayîrî de têkoşîn bikê. Ganî mayanê bînî zî eynî hewa seba aştîye têkoşîn bikero. Ganî êdî domanê tu kesî nemiro. Waştişê destê dergekerdişî yê aştîye bi lez ganî bêro cewabdayene û dest vengî de nêmano. Ganî tepişteyê sîyasî bêrê veradayîş. Ganî pereyê ke semedê şerî xerc kenê, bidê şarî. Ganî destê aştîye ke hetê Birêz Abdullah Ocalanî ra ameyo dergkerdiş, bi lez bêro girewtiş."