Rozerîn Gultekîn

 

STENBOL - Cinîyê Koma Kampanya Femînîstan ê hemverê Cînayetê Cinîyan, dîyar kerdî ke sebebê qetilkerdişê cinîyan, polîtîkayê vernîya qetilkerdişê cinîyan gênê, pê nînê û şikdarî yenê pawitiş. Cinîyan wina vat: “Ma do hem semedê Ayşe Tokyaz, hem zî semedê pêro cinîyê bînan têkoşîn bikerê. Tehemulê ma semedê vînîbîyayîşê cinîyêke nêmendo. Ma venga pêro cinîyan danê ke semedê heq û cuya xo, xo rêxistin bikerê.”

 

Wendekara unîversîte Ayşe Tokyaz ke Stenbol de hetê polîso verî Cemîl Koçî ra amî qetilkerdiş, waya Ayşe Tokyaz vernîya ke Ayşe Tokyaz bêro qetilkerdiş muracatê emniyetî kena û tehdîd polîsan rê neql kerd. La eminîyet vera prosesê pawitişî bido destpêkerdiş, waştişnameyê gerrekerdişê şikdar Cemîl Koçî rê neql kerd. Agahîyê der barê şikdar de vejîyayî werte, binpaykerdişê sîstematîk ê dewlete zî mojna. Vejîya werte ke mergê bişik ê cinîyêke di serrê verî Amed de bi şik dinyaya xo bedelnaye zî têkiliyê Cemîl Koçî est o. La o wext zî derheqê şikdarî de çîyêk nêame kerdiş.

 

Cinîyê Koma Kampanyaya Femînîstan ê hemverê Cînayetê Cinîyan de ca gênî, derheqê qetilkerdişê cinîyan de qisey kerdî.

 

'Camêrdî sîstem ra hêz gênê'

 

Ruya Kurtulmuş da zanayîş ke şîdetê camêrdî yewbînan ra xoser nîyê û pêro dewamîyê yewbînan ê. Ruya Kurtulmuş wina va: “Camêrdî bêcezaverdayîş ra cesaret gênê û sîstem ra hêz gênê. Cînayetê Ayşe Tokyaz şibîyeno ya Munevver Karabulute. Demê peyîn de qetilkerdişê cinîyan resayo sewîyeyêka bi xof. Camêrdê şikdar; polîs, dikandar, muezzîn, camêrdê ke cuya ma de yê. A ke Ayşe Tokyaz qetil kerd polîs bî û verê zî cînayetêk cinîyan de nameyê ey derbaz bîyo. Waya Ayşe pêwa muracat kena la netîceyêke nêgîna. Ma do hemverê şîdetê camêrdî de bêveng nêmanê, têkoşîn bikerê.”

 

‘Ayşe verê çiman de amî qetilkerdiş’

 

Rojda Aksoy zî derheqê babete de qisey kerd û va: “Ma do heqê cuye bipawê. Tewr peyîn ma semedê Ayşe Tokyaz meydanan de bî. Waya Ayşeye muracatê emniyetî kena. Hetkarî wazena. La çîyêk nîno kerdiş û Ayşe verê çiman de yena qetilkerdiş. Eynî çî semedê Fatma Altinmakas zî derbasdar o. Pêwa ke şina polîsan rê gerre kena, agêrena keye û hetê mêrdeyê keyeyî ra yena qetilkerdiş. Ma hemverê qetilkerdişê cinîyan bêveng nêmanenê û têkoşîn bikerê. Ez venga pêro cinîyan dana ke nê têkoşînî de ca bigîrê û xo rêxistin bikerê, wayîrê heq û cuya xo vejîyê.”