AMED - Fatma Gulan Onkol ke cinîyanê Sûrî dir kom bî, va; "Ma wazenê no bajar hetê cinî û tutan ra bêro îdarekerdiş."

 

Taxa Cevatpaşa ya Sûrî ya Amedî de bi beşdarîya Hemşaredara Sûrî Fatma Gulan Onkol, endamê meclîsî û temsîlkarê Muduriyetê Cinîyan, kombîyayîşêk cinîyan ame organîzekerdiş. Xeylêk cinî beşdarê kombîyayîşî bî.

 

"Şima serkêşê nê komelî yê"

 

Fatma Gulan Onkol dîyar kerd ke Merkezê Destekdayîşê Cinîyan semedê cinîyan xizmet keno û cinî eşkenê semedê pêro hewcedarîyê xo merkezî dir têkilî ronê û wina va: "Ma wazenê no bajar hetê cinî û tutan ra bêro îdarekerdiş. Ez ewro sey hemşaredar nê, la sey hevale û hemraye şima dir a. Şima cinî tena nîyê; pîya ma do barê xo şenik bikerê. Şima serkêşê nê komelî yê; şima cuye mûnenê û rêxistin kenê. Ma do bi pêgirewtiş xeylêk meseleyan çareser bikerê."

 

'Sûr ê ma hemîne yo'

 

Cinîyan kombîyayîş de waştişê newekerdişê taxe xo, akerdişê kursê meslegî û organîzekerdişê çalakîyê komelî kerd. Fatma Gulan Onkol qiseykerdişê xo bi vatişê "Sûr ê ma hemîne yo; ganî ma pîya bipawê û semedê problemê ci rê çareseriyan bivînê." peynî kerd.