Evîn Çîftçî

 

RIHA - Endama OHD’yî Ayşe Şehrîban Demîrel derheqê caardişê heqê hêvîyê de qisey kerd û wina va: “Ganî sere de semedê Birêz Abdullah Ocalanî heqê hêvîyê pê bêro û no qerar çarçewaya sererastkerdişê qanûnî de açaryo asayîş.”

 

Rayberê Şarê Kurdî Abdullah Ocalanî 27ê Sibate de vengdayîşê ‘Aştî û komelê demokratîkî’ kerd û nê dir semedê şarê Tirkîya, kurd û pêro şaran bî destpêkê demêk tarîxî. No vengdayîş sere de semedê Abdullah Ocalanî û tepişteyanê bînan caardişê heqê hêvîye zî mojneno. Çarçewaya prosesê aştî û komelê demokratîkî de no caardiş yew gamê somutî yeno vînayîş. Endama Îdareya Merkezî ya Pêroyî ya Komeleya Huqûqnasê semedê Azadîye (OHD) ya Rihayî Ayşe Şehrîban Demîrel derheqê heqê hêvîye de ajansê ma rê qisey kerd û dîyar kerd ke semedê prosesî na gamêka krîtîk a û gama ke bêro eştişî ya.

 

‘Gamê lazimî ganî bi lez bêrê eştiş’

 

Ayşe Şehrîban Demîrel dîyar kerd ke xeylê gamê tarîxî ameyê eştiş û va: “Sere de xeylêk vurnayîşê qanûnî est ê. Bendewarîya ma a ya ke gamê lazimî bi lez bêrê eştiş. Çi heyf, selahîyetdarê dewlete hetê huqûqî de gamê ke bêrê eştiş erey fînenê. Bêşik no zî nêzdîbîyayîşê dewlete yê hemverê prosesî mojneno. Bendewarîya ma a ya ke qerarê DMME’yî yê derheqê Tirkîya de ameyê dayîş çarçewa qanûnî de pê bêrê. Eştişê nê gaman nêzdîbîyayîşê hemverê prosesî zî mojneno.”

 

‘Ganî şert û mercê azadîya Abdullah Ocalanî pê bêrê’

 

Ayşe Şehrîban Demîrel dewam de wina va: “Caardişê heqê hêvîye semedê netîceyê pozîtîf zaf muhîm o. Tirkîya goreyê peymanê ke terefgirê ci ya, ca nêana. No zî beno sebebê problem û mexduriyetan. No heq sere de Birêz Ocalan û bi hezaran tepişteyanê muebetî bi tesîr keno. La ma zanê ke nê qerarî dir do şertê azadîya Birêz Abdullah Ocalanî û tepişteyê sîyasî bêrê awankerdiş. La dewlete nê ra tersena û xo dana het. Ganî prosesê ‘aştî û komelê demokratîk’ dir caardişê heqê hêvîye do proses pozîtîf aver bero. Nê hetî ra no muhîm o. Nê qerarê heqê hêvîye sere de semedê Abdullah Oclanî pê bêro û no qerar açaryo asayîşê qanûnî.”

 

‘Çîyo ke komel dewlete ra paweno’

 

Ayşe Şehrîban Demîrel tewr peyîn wina va: “Çîyo ke tewr zêde komel, dewlete û îqtîdar ra paweno huqûq o. Ma sey OHD bi serran o hemverê binpaykerdişê heqan têkoşîn kenê. Ma xeylêk rey bi xebatê xo dayî werte ke ganî vurnayîşêk bibo. Ganî dewlete hetê mîmarê prosesî Birêz Ocalanî de gaman bierzo û azadîya ey pê bîyarê. Bi huqûqî heqan bîyarê ca. Nê hetî ra tena STK ganî pêro hetê komelî hemverê nê de vengê xo berz bikerê. Wayîr vejîyê. Ma venga pêro hetan kenê. Ganî hem heqê hêvîye pê bêro, hem semedê kurdan statu bêro nasnayîş. Nê hetî ra ganî xeylêk sererastkerdişî bêrê kerdiş.”