Pelşîn Çetînkaya

 

AMED – Suzan Memedoglu Aksoy ya ÎHDyîje bale ant ser 11ine Paketa Edaletî û va: “Rojda Yakişikli hetê Okay Gurî ra ameye qetilkerdiş. No mîsalêko verçim o. Ganî cimat hemverê pakêtî têkoşîn bikero.”

 

Hukmat binê nameyê “reformê edaletî” de 11ine Paketa Edaletî vet. Paketa Edaletî krîzêko newî yê asayîşî vecîyaye û heqê cuyayîşê cinîyan bin lingan kerd. Pakête dir qatil, caardoxê şîdet û desteştişê serbest ameyî veradayene.

 

Mabêne 24-25ê kanûne de parlamentoyî de ame qebûlkerdiş û 11ine Paketa Edaletî 26ê kanûne de ameye caardiş. Dimayê nê prosesî veradayîşê tepişteyan dest pêkerd. Tepişteyê edlî Okay Gur ke bi na pakête serbest ame veradayene Rojda Yakişikli qetil kerd.

 

Temsîlkara Sereka Şubeyê Komeleya Heqê Merdiman (ÎHD) ya Amedî Suzan Memedoglu Aksoy babete ser o qisey kerd.

 

Suzan Memedoglu Aksoy dîyar kerd ke 11ine Paketa Edaletî merdiş û şîdetê cinîyan ser o zêde kerd û va: “Na pakête pakêtêka ke cinîyan hedef gêno. Ma Paketa Edaletî qebûl nêkenê. Demo ke ma muhtewayê pakête vînenê ma vînenê ke a pakêtêka ke têkoşînê cinîyan hedef gêna û peynîya cuya cinîyan ana. Ma mîsalê tewr verçimî yê nê qetilkerdişê Rojda Yakişikli de dî.”

 

Suzan Memedoglu Aksoy dîyar kerd ke polîtîkaya dewlete cuya cinîyan hedef gêna û wina va: “Dewlete bixo sîstemêko pederşah a. Nê semedî ra dewletêka ke bi zihnîyetê pederşahî ameye awankerdiş cinîyan û heqê înan nêpawena. Eke eksê ci bîyayîne, camêrdê ke benê sebebê merdişê cinîyan polîtîkaya bêcezakerdişî dir rî bi rî nêbîne. Û ez wazena nê dîyar bikerî; eke qatil cezayanê zaf pîlan bigirewtêne cinî nêameyîne qetilkerdiş.”

 

Suzan Memedoglu Aksoy dîyar kerd ke ganî cimat bi pêroyî hemverê hêrişanê cinîyan ser û heqê înan têkoşîn bikero û wina peynîya qiseykerdişê xo ard: “Her kes ganî hemverê 11ine Paketa Edaletî têkoşîn bikero.”