ÎZMÎR – Cinîyan hemverê hêrişanê çeteyê girêdayê Hukmatê Demkî yê Sûrîye taxa Şêxmeqsûd û Eşrefîye yê Helebî ser o reaksîyon mojnayî û vatî, “Nê hêrişî zirar danê hêvîya aştîye ro. Ma wazenê hêrişî lezkî bêrê vindarnayîş.”

 

Hêrişê çeteyê girêdayeyê Hukmatê Demkî yê Sûrîye taxê Şêxmeqsûd û Eşrefîye yê Helebî ke 6ê çeleyî de dest pêkerdîbî ser o dewam kenê. Sewbîna Tirkîya zî bi dronanê xo yê “Bayraktar” ser taxa Şêxmeqsûdî de pernena û bombavaran kena, hêriş û qirkerdişê çeteyê HTŞî de zî rol gêna. Nê hêrişan de zaf sivîlî ameyî qetilkerdiş û bi hezaran merdimî koçber bîyî, eynî demî de taxî binê ablûqî de yê. Xoverdayîşê şarî û Hêzê Asayîşê Zereyî hemverê hêrişan dewam kenê.

 

Cinîyê ke hemverê hêrişan de reaksîyon mojnayî, dîyar kerdî ke nê hêrişî derbeyêk prosesî rê yê û eşkenê zirar bidê hêvîya aştîye ro. Cinîyan mojnayîşê xo şarê Rojawanî dir, venga pêro dinya dayî ke hemverê hêrişan reaksîyon bimojnê.

 

‘Gelo Tirkîya komê çeteyan dir pê kena?’

 

Endama Meclîsê Cinîyan a Partîya Çepî ya Kesk Nevîn Aytekîn, dîyar kerd ke hêrişê çeteyê girêdayeyê Hukmatê Demkî yê Sûrîye taxê Şêxmeqsûd û Eşrefîye yê Helebî ser o eşkenê prosesê Tirkîya rê ziyan bidê. Nevîn Aytekîn va, “Demo ke prosesê aştîye Tirkîya dewam keno, zext û hêrişê kurdanê Sûrîye ser o xelet o. Nê kerdişî do prosesî asteng û xira bikerê. Sewbîna eşkerayîyê Bahçelî zelal ê. Verê ey ziwanê aştîye şuxulnayêne. Vatêne, ‘Ganî aştî bibo, baş beno.’ Eşkerayîyê pozîtîfî sey ‘Wa Abdullah Ocalan bêro parlamento û qisey bikero’ dayîne, labelê semedê hîn sebeban nika newe ra ziwanê xo wuşk kerdo û ziwanêko bi rastî negatîf şuxulneno. Eşkerayîyê negatîfî hemverê kurdan de est ê. Ganî nê pîya bêrê ercnayîş. Yanî hêrişê uca, pêwa eşkerayîyê Bahçelî, merdimî keno mîyanê endîşe. Nê persê ke gelo ê pîya têgêrenê vejeno werte. Hêrişê ser nê taxan, bi taybetî îlankerdişê şerê hemverê cinîyan û qetilkerdişê merdiman bi çekan nê taxan, çîyêk ke bêro qebûlkerdiş nîyo. Hukmatê Demkî yê Sûrîye zî wazeno QSDî bikero quncik û înan mecbur bikero ke goreyê waştişê xo têbêgirê. Peymane de hema zelalîya temam çin a. Bi nê rengî ez fikrîyena ke nê hêrişî hedef kenê ke QSDî teng bikerê û waştişê xo na babete de bi dest bikerê yan ferz bikerê.”

 

‘Rojawan tena nîyo!’

 

Nîspet Uzrek dîyar kerd ke ê hêrişê ser taxanê Şêxmeqsûd û Eşrefîye şermezar kenê û va ke ê kîşte şarê Rojawanî de yê. Nîspet Uzrek va, “Ma semedê hêriş û qirkerdişî zaf hêrs û xemgîn ê, labelê ganî ê bizanê ke şarê kurdî çi beno wa bibo pîya vindeno û nêkeweno mîyanê kayê qijî. Ê zimistanî de, hewayê serdin de hovane hêrişê Rojawanî kenê, bêzerrexuşîşî cinî û tutan hedef gênê. Ma nêeşkenê bi şewe rakewê. Ganî ma şarê Rojawanî dir mîyanê pêgirewtişî de bimanê. Ganî piştîdayîş bidê înan. Rojawan tena nîyo! Ma înan û heme bindestan dir ê. Ma pêro hêrişê hemverê kurdanê Rojawanî û Rojhelatê Mîyanên şermezar kenê. Bes o, do no çiqas dewam bikero? Ê çî wazenê? Cinîyê kurdî ganî her cayê wurzê lingan ser. Bes o, wa tutî û ciwanê ma binê erdî de nêrê nimitiş. Wa cinîyê dinya vengê ma bieşnawê. Kurdî, tirkî, erebî, ganî her kes wurzo lingan ser. Ma şer nêwazenê, ma merdiş nêwazenê. Ma wayê, biratî û aştîye wazenê. Ê do çiqasî gonîya kurdan birijênê? Ez pêro şarê ma yê ke Rojawan û Rojhelat xo ver danê serkewtiş wazena û înan hemine rê silam kena. Wa şarê ma berz vindero, kes nêeşkeno zorê ma bero, semedo ke îradeyê ma xurt o. Ma wayîrê nê yê, ma bi hêz ê.”

 

‘Demo ke kurdî Rojawan de yenê qirkerdiş, tîya de aştî nîna bidestkerdiş’

 

Îdarekara Rêxistina Qezaya Bayrakliyî ya Partîya Têduştî û Demokrasîyê Şaran (DEM Partî) Fatma Karabay, dîyar kerd ke nê hêrişî aştîya herêmî rê ziyan danê û bale ant ser rolê Tirkîya. Fatma Karabay dîyar kerd ke Tirkîya tena nê, la pêro dinya ganî aştî bêro caardiş û va: “Tîya de aştî nîna caardiş demo ke kurdî Rojawan de bi hawayêko bêedalet û bêmerdimîye yenê qetilkerdiş. Dewlete zî tîya de bawerîya xo vinî kenê. Nê semedî ra ganî demêk rew de gamê demokratîkî bêrê eştiş ke aştî bêro caardiş. Demo ke ma goş danê xeberan ‘Rojawan de peyman nêame caardiş.’ Labelê vengdayîşê domdar ê Rojawanî yê semedê dayîşûgirewtiş zî yenê redkerdiş. Eke kurdî ewro sey tehdîd bêrê dîyayene, hêzê emperyalîst ê hîna tehlukeyîn est ê. Ganî dewlete hewldayîşê xo bido hêzê emperyalîstî ser o. Eke nifûsê sivîl yenê qirkerdiş, bêvengîya hemverê nê qirkerdişê merdimîye bi qasê sucdaran sûcdar keno. Ganî nê qirkerdişê lezkî bêrê vindarnayîş. Semedo ke qirkerdişê sivîlan qet aştî nêano û qet hêvîya aştîye hişê merdiman de nêdano ro. Ganî nê qirkerdişî lez bêrê vindarnayîş.”