STENBOL- Torra Pîştîdayîşî ya Koçberan derheqê 21ê adare Roja Têkoşînê Vera Cîyakerdişê Nîjadî ya Mîyanneteweyî de eşkerayî daye û vat ke dinya de tewr kêmî 120 mîlyon kesî bi zorî cayê xo ra ameyê dûrfîyayene û vat: “Na hûmare do serra 2036î de bibo 130 mîlyon. Nîjadperestî zerar dana haştîya mîyanê komelî. Ganî heqê koçberan bêrê pawitene.”

 

Serra 1960î de Başûrê Afrîkaye de qierkerdişê Sharpeville de 69 kesî ameyê kiştene. Vera naye Neteweyê Yewbîyayeyî (NY) serra 1965î de 21ê Adare sey Roja Têkoşînê Vera Cîyakerdişê Nîjadî ya Mîyaneteweyî îlan kerd. Tora Piştîdayîşî ya Koçberan na roje de awanîya Şûbeyê ÎHD’yî yê Stenbolî de eşkerayî daye.

 

‘Dinya de tewr kêm 120 mîlyon kesî koçber bîyê’

 

Endama Torre Ruken Kalin wina vat: “Tirkîya zî hetê na peymane de ya la Peymana Heqanê Merdiman a protokolê 12. hema îmza nêkerda. Ewro dinya de şer û krîzê ekonomîkî hema zî dewam keno. Goreyê NY’yî badê hêrişanê Amerîka- Îsraîlî yê Îranî ser o 3 milyon kesî koçber bîyê. Lubnanîde zî 700 hezar kesî keyeyanê xo ra durî kewtê.”

 

‘Şer beno sebebê koçberî’

 

Kalin vat: “Tirkîya de zî nika bi hezaran koçberî est ê. Dewranê peyênan de zaf hêrişî koçberan ser o ameyê. Mersîn de welatîyêko Başûrê Kurdîstanî seba ke Kurdkî qisey kerdbî hêrişî ey amebi kerdene. Karkero efxan Vezîr Mihemed Nurtanî ame kiştene û bedenê ci ame veşnayene. Qeyserî de koçbero 17 serre Ehmed Handan el-Naîfe ame kiştene. Nîjadperestî zerar dana aştîya mîyanê komelî. Coka ganî qanûnê vera nîjadperestî yê xurtî bêrê caardene. Şer beno sebebê koçberîye, coka ma venga warê neteweyî kenê ke ganî lez şer bêro vindertene.”