MERKEZÊ XEBERAN - Gerîlayê azadîya Kurdistanî, Herêmê Pawitişî yê Medyayî de Roşanê Newroze bi coşêk pîl pîroz kerdî.

 

Bi wesîleya roşanê Newroze gerîlayê azadîye koyanê Kurdistan de ameyî têhet û bi ruhêk kolektîf Newroze pîroz kerdî. Pîrozbayîye de gerîlayan roşanê yewbînan pîroz kerd. Fermandarê HPG’yî Amed Melezgirt, Seyîtxan Dersim, Mahîr Serhed, Sîdar Heştenîn û Raperîn Engîzek zî beşdarê pîrozbayîye bî.

 

Pîrozbayîye de Fermandarê HPG’yî Amed Melezgirt, bal ant cayê tarîxî û manaya Newroze ya têkoşînê azadîye de. Melezgirt, ard ziwan ke Newroze tena roşan nîya, eynî demî de sembolê xoverdayîş û îradeyê azadîye ya.

 

Dimayê qiseykerdişan gerîla û fermandar pîya adirê  Newroze we kerdî. Dima ra gerîlayan dorê adire de kilaman vatî, govende kerdî û coşê Newroze pîlêr kerdî.

 

Sewbîna Koma Awazê Çiya tewrê pîrozbayeye bîbî û bi deyîranê xo coşa Newroze koyanê Kurdistanî de  berz kerdî.