MERKEZÊ XEBERAN - Platformê Sazîyanê Demokratîkî yê Erzirom û Mûşî re hemverê tepiştîş û destbendkerdişanê dima Newroze nîşan dayî û waştî ke nê zordarî lezkî bêrê peynîkerdiş.

 

Reaksîyonê hemverê tepiştiş û destbendkerdişanê dima pîrozbayîyanê Newroze, her şino zêde benê. Erzirom û Mûşî de tepiştîş û destbendkerdişî ameyî protestokerdiş.

 

Erzirom

 

Platformê Sazîyanê Demokratîkî yê Erziromî, vernîya awanîya DEM Partîyî ya Erziromî de eşkerayî da. Eşkerayîye de pankartê “Praktîkê zordarî peynî bikerê, tepişteyan veradê” ame berzkerdîş. Eşkerayî hetê Hemserekê DBPyî yê Erziromî Ramazan Karakaş ra ame wendîş.

 

Karakaş dîyar kerd ke Newroza emserî de waştişanê azadîye, piştîdayîşî û têduştîye vejîyayî vernî û qonaxêk tarîxî bî. Karakaş va: “Wazenê coşa şarî yê Newroze binê nê versî û praktîkanê zordarî de biverdê. Dewamkerdişê nê zordarîyan hêvîya aştîya komelî û hîsê bawerîye çin keno. Semedê aştîya komelî û hîsê bawerîye ya komelî, ganî nê zordarî bêrê peynîkerdiş, ciwanê tepişteyî bêrê veradayîş.”

 

Eşkerayî bi sloganê “Biciwîyo xoverdayîşê zîndanan” peynî bî.

 

Mûş

 

Platformê Sazîyanê Demokratîkî yê Mûşî zî qezaya Kopî de vernîya awanîya DEM Partîyî de eşkerayî da. Endamê Komeleya Hetkarîya Keyeyê Tepişteyan û Mehkûman (TUHAY-DER) Şakir Kandemîr eşkerayîye de qisey kerd û va: “Ganî nê zordarî lezkî bêrê peynîkerdiş û ciwanê ma bêrê veradayîş. Ma ancî yew reye bi hawayêk xurt waştişê caardişê edaletî kenê.”

 

Eşkerayî bi çepikan peynî bî.