Yeşîm Oruç 

 

MERKEZÊ XEBERAN - Goreyê dayeyê şîdetî yê aşmê adare, tewr tay 29 cinî û 2 tutî ameyî qetilkerdiş; 20 cinî û 2 tutî zî binê şertê bigumanan de dinyaya xo bedelnayî.

 

Bajarê Kurdistanî û Tirkîya de şîdetê mêrdan dewam keno ke sîstematîk vila beno û hetê polîtîkayê bêcezaverdayîşî ra yeno paştîdayîş. Sucdar zafê reyan mêrdeyê tewr nêzdî cinîye yo û şîdet cayê ke sey “tewr asayîş” yenê hesabkerdiş de pê yeno. Qerarê pawitişî yenê binpaykerdîş, gerreyê peygoş yenê kerdiş û cinî bêmabêne hetê mekanîzmayê ke înan muracat kerdî ra bi tena xo yenê verdayîş. Merdişê bigumananê cinîyan dewam kenê û heto bîn de zî dosyayê ke ameyî akerdiş pabeyê cipersayîşî de yê.

 

La cinî israr kenê ke do şîdetê mêrdan û polîtîkayê bêcezaverdayîşî xo vîr ra nêkerê, hesab bipersê û wayîrê cuya xo bivejê.

 

Goreyê dayeyanê aşma adare ke çapemenîye ra ameyî arêdayîş, tewr tay 29 cinî û 2 tutî ameyî qetilkerdiş; 20 cinî û 2 tutî binê şertê bigumananî de dinyaya xo bedelnayî.

 

Kerdox mêrdeyê tewr nêzdî cinîye yo

 

Cinîyanê ke ameyî qetilkerdiş ra, 1 hetê wendekarê xo ra, 2 hetê mêrdeyê ke înan dir ciwîyayîne, 1 hetê mêrdeyê verênî ke aye dir zewicîyabî, 7 hetê mêrdeyê ke înan dir prosesê cîyabîyayîşî de yê, 10 hetê mêrdeyê ke înan dir zewicnayebî, 1 hetê birayê xo, 1 hetê lajê xo, 1 hetê kesêk nênasnaye, 1 hetê mêrdeyî ke îrtîbatê aye bi ci ra nêyeno zanayîş, 1 hetê xalê xo, 1 hetê mêrdeyê waya aye ke ey dir zewicîyabî, 1 hetê mêrdeyê verênî ke ey dir zewicîyabî û 1 hetê zamayê xo ra ameye qetilkerdiş.

 

Goreyê bajaran vilabîyayîşê cinîyanê ke ameyî qetilkerdiş

 

4 Stenbolî de, 2 Aydinî de, 3 Bursayî de, 1 Edene de, 2 Îzmîrî de, 2 Muglayî de, 3 Mersînî de, 1 Trabzonî de, 1 Kayserî de, 1 Aksarayî de, 1 Nevşehîrî de, 2 Amedî de, 1 Samsûnî de, 1 Hatayî de, 1 Nîgdeyî de, 2 Manîsa de û 1 Eskîşehîr de.