Buşra Turan

 

AGIRÎ - Qezaya Panosî ya Agirî de Melek Kartal ya 14 serrî ameye destbendkerdiş û bi serran o tepişte ya. Dayika aye Aynur Polat derheqê bêhuqûqîyê ke ameyê ciwîyayîş de qisey kerd û va: “Emrê tutî de kênaya mi ameye tepiştiş. Kênaya min a 14 serrî kerdî hucreyê tarî. Ma êdî aştîye wazenê û ganî pêro tepişteyî azad bibê.”

 

Zîndanê Tirkîya û Kurdistan de hûmara tepişteyanê sîyasî 15 hezar derbas kerda û goreyê dayeyê Komeleya Heqê Merdiman (ÎHD) 651 ci ra giran hezar û 517 tepişteyê nêweşî est ê. Pêwa prosesê Aştî û Cimatê Demokratîk hema zî sererastkerdişêk qanûnî nêameyê kerdiş. Keyeyê tepişteyan waştiş kenê ke îqtîdar wa dest polîtîkayê meşgulkerdişî ra vera bidê û gamanê huqûqî-somut bierzê.

 

Dayîka tepişteya bi nameyê Melek Kartal ke 14 serrî bî Panosê Agirî de ameye destbendkerdiş û bi serran o zîndanêk ra surgunê zîndanêk bîn yeno kerdiş, Aynur Polat derheqê çîyê ciwîya de qisey kerd.

 

Tuta 14 serrî destbend kerdî

 

Aynur Polat da zanayîş ke kênaya aye Melek Kartal 14 serrî sereştişê keyeyî de ameye  destbendkerdiş û wina va: “Polîsan eştî keyeyî ser. Semedê kênaya min a 14 serrî bî. Meleke berdî û şî. Ez zî bi zor înan dir şîya. Meleke bi tena sereyê xo kerdî hucreyêk tarî. Di hîrê polîsî semedê cipersayîşî şî verê Meleke. Kufr, heqeret, tehdîd her çî vatî. Meleke qij bî. Mi xo eşt verê berî. Dimayê nê hedîseyî dozgerî talîmat da keye ancî bêro cigêrayîş. Ma şî cigêrayîş kerdî. Cigêrayîş de çîyêk nêvejîya.  Meleke veradayî, hewteyêk dima ancî eştî keyeyî ser.”

 

Tutan rê îşkence

 

Aynur Polat wina dewam kerd: “Sereştişê diyîne de kênaya mi Meleke ameye destbendkerdiş û mêrdeyê mi zî dewaya KCK’yî ra ame tepiştiş. 4 tutê min ê qijî keye de bî. Vernîya çekan dayî sereyê ma. Polîsî mêrde bî. Yew polîsêk cinî çinbî. Ma bi no hawayî cigêrayîş kerdî. Tutê mi pêro bermayîne.”

 

‘Wa tecrîdê cinîyan ser o wurzo’

 

Aynur Polat wina peynî ard: “Kênaya mi zîndanê cinîyan ê Sîncanî de tepişte ya. Îmkanê ma çin ê ma zîyaret bikerê. Waştişê ma oyo ke pêro tepişteyî bêrê veradayîş. Ma roşanan de eşkenê şêrê pêvînayîş. Tewr peyîn serra vîyarte ma şî. Ma nê roşanî de nêşî. Waştişê ma oyo ke pêro tepişteyî bêrê veradayîş. Sûcê tu kesî çin o. Bêsûc tepişte yê. Wa zextê tepişteyanê cinîyan ser o verabidê. Wa aştî bêro û dayîkî mebermê. Ganî dewlete gamanê huqûqî bierzo.”