Bêrîtan Tunç

 

ÎZMÎR - Cinîyan derheqê hêrişanê hemverê dibistana Rihayî û Mereşî de ercnayîş kerdî û dîyar kerdî ke çîyê ke yenê ciwîyayîş munferît nîyê, problemê sîstemî yê û ganî lezkî vernîya nê çîyan bêro girewtiş.

 

Hêrişanê hemverê dibistananê Rihayî û Mereşî û dima ra parekerdiş ê tehdîdan ê çapemenîya dîjîtale ser o, hawirdorê bêasayîşî yê wareyê perwerdeyî mojna. Hêrişan de zaf kesî dinyaya xo bedelnayî û birîndar bîyî. Dimayê nê, zaf bajaran de çalakîyî ameyî organîzekerdiş. Kedkara perwerdeyî Nazan Turk û Gul Ceylan derheqê krîzanê sîstemê perwerdeyî, zordarîyanê komelî-psîkolojîkî yê wendekaran ser de qisey kerdî.

 

‘Ganî sîstemê perwerdeyî ancî bêro destgirewtiş’

 

Mamoste Nazan Turk va ke çîyê ke ameyê ciwîyayîş tena mamoste, wendekar, keye tesîr nêbîyê, heme cimatî ser o tesîr kerd û va: “Zaf sendîkan helwestê hembeşî mojna û dest xebate ra verada. Bingehê nê tabloyî de polîtîkayê wezaretê perwerdeyî est o. Sîstemê bîyaye tutan nêresneno. Xizmetê rêberîye rindî nêxebitênê. Dibistanan de asayîş çin o. Tena yê fîzîkî nîyo, ez qalê mufredatî, dîsîplînî û îdarekerdişî kena. Sewîyeya dibistana sereyîne de ne cezayêk dîsîplînî yê bi tesîrî est o ne zî praktîkî de sinife de bimnao est o. No zî hêzê cezakerdişî yê mamosteyan wedarneno. Sîstemê perwerdeyî her wext vurîyeno. No zî problemêk tewr pîl o.”

 

‘Hemkarîya keyeyî dir muhîm o’

 

Nazan Turk peynîya qiseykerdişê xo de wina ard ziwan: “Ganî keye îdareyê dibistanî û mamosteyan dir hemkarîye de bibo. Wexto ke derheqê wendekarêk de problem vejîyeno ma keye veng danê la keye qebul nêkeno. Vanê tutê mi wina çî nêkeno. La ma sey kesanê teberî ewnîyenê problemî objektîf vînenê. Na mesele de ganî keye meseleyan cidî bigîro.”

 

‘Ganî lezkî vernîya nê bêro girewtiş’

 

Kedkara perwerdeyî Gul Ceylan zî va ke çîyê ke ameyî ciwîyayîş tesaduf nîyê û va: “Problemanê sîstemê perwerdeyî yê bi zorî, problemê asayîşî û nêcaardişê mekanîzmayê dîsîplînî problemî giranêr keno. Pêwa nê wendekarî hemverê mamosteyan de her ke şinê zafêr zordarî kenê. Keye vanê tutê ma wina çî nêkeno. Sey ke çîyêk nêbîyo têgêrenê. Kes berpirsîyarî nêgêno. No zî tabloyî giranêr keno. Ganî lezkî tedbîrî bêrê girewtiş. Tîryakbîyayîşê kayan kontrolî ra vejîyayo. Ganî lezkî tedbîrî bêrê girewtiş.”

 

‘Çira o wext mudaxele nêame kerdiş’

 

Gul Ceylan wina dewam kerd: “Ganî no hedîse bi grubêk nêro qalkerdiş. No netîceyêk o. Hetêk bîn ê nê est o. Erê rêxistinê wina est ê: no newe nîyo, bi serran est ê. Demê ke hevalê ma yê mamoste ameyî qetilkerdiş, hêrişê îdarekarê dibistanî kerdî est ê. La o wext tedbîrê lazim nêgirewtî. Vizêrî şan de hîn operasyon ameyî kerdiş la no zî rastîye nêvurneno. Nê grubê wina xo bi xo yenê zanayîş. Çira o wext tedbîrî nînê girewtiş. Dibistanan de praktîkê MESEMî zî wareyêk bi rîsk ê cîya yo. Wareyêk o ke ver bi teqîyayîşî yo. La rindî nîno rojeve. No problemêk muhîm o. Ganî semedê çareserîya problemanê wareyê perwerdeyî heme sendîka tewrê prosesî bibê.”