AMED- Şaredarîya Amedî ya Şaristanê Girdî eşkera kerd ke aye seba newekerdiş û hîrakerdişê rayîran, viraştişê peyarayîran û newekerdişê roşnîyan darê ke Bulwarê Firatî yê qezaya Peyasî de yê, wekenê û sewbîna cayan de ronenê. Labelê Meclîsê Ekolojî yê Amedî vera nê kerdişî vejîya.

 

Serekîya Dayîreyê Park û Baxçeyan ê Şaredarîya Amedî ya Şaristanê Girdî, seba projeyê newekerdişê Bulwarê Firatî dest bi xebatan kerd. Meclîsê Ekolojî, Baro û hemwelatîyan vera nê karî nêrazîbîyayîşê xo mojna. Hemverfekê Meclîsê Ekolojî yê Amedî Sabrî Kiliçî da zanayene ke darê 20-30 serrî yenê wekerdene û wina vat:“Nê darî, darê herî kehen ê qezaya Peyasî yê. Ma wekerdişê daran qebul nêkenê. Her yew dare canêk a û vîrê nê şaristanî ya. Ma qebul nêkenê ke vîrê nê cayî bêro bedilnayene. Ma şaredarî ra zî vat, labelê ê projeyê xo de israr kenê. Serê sibayî darêk wekerde, la ma mudaxale kerd. Ma do nêverdê darî bêrê wekerdene.”

 

Sabrî Kiliçî da zanayene ke darê ke verê cû şaredarî berdbî, heme huşk bîyê û vat ke ê do heta peynî xover bidê.

 

Şaredarîya Amedî ya Şaristanê Girdî zî derheqê babete de eşkerayîyêk weşanaye. Sekreterê Pêroyî yê Şaredarîya Amedî ya Şaristanê Girdî Serdar Bakiroglû zî eşkerayîya xo de dîyar kerd ke binawanî û peyzajê bulwarî bîyo 20 serrî û êdî seba lazimtîyanê ewro û girdbîyayîşê şaristanî qêmî nêkeno. Serdar Bakiroglû îfade kerd ke rewşa nikayîne seba trafîk û peyayan rîsk awan keno û vat ke kombîyayîşê awa varanî û kêmaneyê binawanîya kanalîzasyonî beno sebebê problemanê derûdorî. Serdar  Bekîroglû vat ke nê semedî ra newekerdişê buşwarî bîyo lazimtîyêka şarî ya muhîme.

 

‘Proje goreyê hemsencîya ekolojî ye’

 

Serdar Bakiroglû dîyar kerd ke sey Şaredarîya Amedî ya Şaristanê Girdî bi berpirsîyarîya hemverê waştişanê şarî û lazimtîyanê newe yê şaristanî, projeyêkê hîra ke hemsencîya ekolojîke paweno, ameyo amadekerdene. Eşkerayî de xebatê ke çarçewaya projeyî de ameyê plankerdene wina ameyê rêzkerdene:

 

Rayîr do bêro hîrakerdene û bibo 6 şerîd

 

Peyarayîrê neweyî do bêrê viraştene

 

Rayîrê bîsîkletan do bêrê viraştene

 

Sîstemê roşnîye do bêro newekerdene

 

Bineawanîyê awa varanî do bêro newekerdiş

 

Dîzaynê çatrayîran, refujê mîyanên û xebatê peyzajî do bêrê kerdene.

 

Eşkerayî de ame dîyarkerdene ke demê amadekerdişê projeyî de hee detayî bi hewayêko şefaf welatîyanê bulwarî, wayîranê cayanê karî û kesanê ke rayîrî şuxulnenê, înan reyde ameyê parekerdene. Serdar Bakiroglû da zanayene ke na çarçewa de hezar kesî reyde anketê rî bi rî ameyê kerdene û encamê vatişanê şarî de se ra 96î beşdaran proje qebul kerdo.

 

Serdar Bakiroglu bale ant pêvînayîşanê rêxistinanê komelê sîvîl û têgêrayîşanê ekolojî reyde ser o û wina vat: “Prosesê amadekarî sazgeh û têgêrayîşanê ekolojî reyde ame parekerdene û xeylê kombîyayîşî ameyê kerdene. Encam de nakokî bi pêkerdişêko hempar de ameyê çareserkerdene. Proje bi ferzkerdişî nê, bi zîhnîyetêko hempar û beşdarî reyde ameyo viraştene. Ma haydarîya raya pêroyî ya demokratîk û ekolojîk heqdar vînenê. Na çarçewa de tena hûmarêka kêm a daran bi rêbazanê zanistî cayanê înan ra ameyê hewilnayene û cayanê musaîdan de reyna ameyê ronayene.”

 

Sewbîna ame zanayene ke rixmê nakokîyan zî Şaredarî û sazgehê sîvîl ê ke vera wekerdişê daran ê, têkilî de yê û cehd kenê ke çareserîyêka hempare bivînê.