MERKEZÊ XEBERAN - TJA bi munasibetê serrgêra şehadetê cinîya şorişgêre û serkêşe Leyla Qasime vîr ard. TJA bala xo ant serê vindertişê Leyla Qasime yê vera zulmî û destnîşan kerd ke a têkoşînê azadîye de bîya sembola îradeyê şarê kurdî û do her dem xoverdayîşê înan de ca bîgîro.

 

Leyla Qasime 12ê Gulana 1974ine de hetê rejîmê Iraqî ra ameye dardekerdene û tarîxê Kurdistanî de sey “Veyva Kurdistanî” û nemira dewaya azadîye ca girewt. Têgêrayîşê Cinîyanê Azadan (TJA) hesabê xo yê medyaya dîjîtal ser o bi munasibetê serrgêra şehadetê Leyla Qasime eşkerayîyêka nuştekî pare kerd.

 

TJA eşkerayîye de Leyla Qasime sey keyna şarê kurdî pênase kerd û va: “Leyla Qasime, têkoşînê azadîya şarê Kurdî de sembolanê îradeyê teslîmnêbîyayîşî ra yewa. Vindertişê aye oyo ke dardekerdişî îdamî ser o zî rûmetê şarê xo pawitêne, vîrê xoverdayîşê vera zulmî de ciwîyeno. Ma bi rêzdarî û minetdarî Leyla Qasime anê vîr. A do xoverdayîşê ma de her bîciwîyo.”