AMED - Atolyeya Hunerî ya Yekta ke do binê banê Mudirîya Kultur û Karê Komelî ya Şaredarîya Peyasî de zaf kurs û çalakîyanê hunerî û kulturî pêşkêş bikero, bi hawayêk fermî ameye akerdiş.

 

Semedê xurtkerdîş û averberdişî yê yewbîyayîşê kulturî, merasîmê akerdişê Atolyeya Hunerî ya Yekta ame organîzekerdiş. Merasîm de Hemşaredarê Peyasî Bêrîvan Gulşen Sîncar û Cengîz Dundar, temsîlkarê Rêxistina DEM Partîyî ya qeza, temsîlkarê sazîyanê komelî yê cîyayan û zaf welatijî tewrê ci bîyî.

 

Hemşaredare Gulşen Sîncar û Cengîz Dundar merasim de dîyar kerdî ke no merkezo newe do bi çalakîyanê xo yê kulturî û hunerî bibo merkezêk muhîm ê neqlkerdişê mîrasê kesanê ke pêwa heme astengîyan bedelî dayî ta ke kulturê xo gane verdê û nê mîrasî nifşanê ameyoxî rê biverdê.

 

Dimayê nawitişê govende û muzîkî, merkez bi merasîmê birnayîşê qurdeleyî bi fermî ame akerdiş.

 

Atolyeya Hunerî ya Yekta xebatanê cîyayê kulturî û kursanê belaşê tembûr, erbane, piyano, govendê folklorîkî, fotograf, sînema û perwerdeyê vengî pêşkêş kena.