MERKEZÊ XEBERAN - TAJÊyî semedê muhîmîya awankerdişê komunan û xopawitişî semedê cinîyanê êzidîyan perwerdeyêk di rojan da. Cinîyê ke tewrê perwerdeyî bîyî dîyar kerdî ke komunî dûrê êzidiyan nîyê, verê zî cuya înan komunan ser o bîya.

 

Prosesêk ke bi vurîyayîş û avuryayîş yo bi heme lezkîya xo dewam keno, Têgêrayîşê Azadîya Cinîyanê Êzidîyan (TAJÊ) semedê verfekê komunanê dewanê Şengalî û cinîyanê bînan Şengalî de 2 rojî perwerdeyê komunî û xopawitişî organîze kerd. Zafê cinîyî tewrê perwerdeyî bîyî. Perwerdeyî de cinîyan bi xo ser komunî û xopawitişî munaqeşe domnayî.

 

Cinîyê ke tewrê perwerdeyî bîyî derheqê muhîmîya komunî de fikrê xo Ajansê NûJINHAyî rê pare kerdî.

 

Cinîyê êzidî dîyar kerdî ke komunî dûrê êzidiyan nîyê, verê zî cuye komunan ser o ameya awankerdiş û wina vatî: “Nê di rojî yo ma esasê ke ma komunî awan bikerê perwerde vînenê. Komunî dûrê êzidiyan nîyê, verê zî cuya ma komunal bî. Dimayê ke destê dewlete, meaş kewt mîyanê ma, komunê ma wuştî. Nika sey cinî ma ancî nê çî rê agêrenê.

 

Ma wazenê her çî mîyanê xo de awan bikerê. Verê wexto ke şarê dexlê xo kom kerdêne des tenekeyî wedaritêne, yewindesine semedê şarî vila kerdêne. Yew cinî eke mêrdeyê aye çînbîne û wayîrê tutan bibayîne, paleyî kerdêne, wexto ke pare xo ardêne keye, heme cinîyanê cîranan zî hetkarîya aye kerdêne ta ke o genim bişrawo cay ardanî. Debarê tutanê xo wina kerdêne. Kamî çi estbî bi yê bîn dir pare kerdêne. Verê ma komunal bî û nika zî ma ci ra dûr nîyê.”