STENBOL - Melahat Durmaza 58 serrî yo ke eba ya, da zanayene ke cinîyî menganê amnanî de problemanê nêweşîyanê cinîyan ciwîyenê û ard ziwan ke cinîyî seba feqîrî û zextanê cimatî erey muracatê xizmetanê weşîye kenê.

 

Bi ameyîşê amnanî dir problemê weşîye yê ke cinîyî ciwîyenê zêde benê û krîzê ekonomî, problemê xoresnayîşê hacetanê hîjyenî û nêtêduştîya mîyanê xizmetê weşîye de rasterast tesîrê cuye cinîyan keno. Bi taybetî menganê amnanî de nêweşîyê cinîyan zêde benê û cinîyî nêeşkenê xo biresnê xizmetanê weşîye. Endama Sendîkaya Karkeranê Weşîye yê Şorişgêran (Dev Saglik-Îş) Melahat Durmaza 58 serrî ya ke eba ya, derheqê babete de ajansê ma rê qisey kerd.

 

‘Cinîyî seba feqîrîye weşîya xo îhmal kenê’

 

Melahat Durmaza da zanayene ke cinîyî menganê amnanî de bi problemanê gûnbîyayîşî, îltîhab û çîyanê bînan dir rî bi rî yenê û cinîyî seba ke şerm kenê weşîya xo nêfikrîyenê û seba nê zî erey şinê nêweşxane. Melahat Durmaza nê çîyî ardî ziwan: “Cinîyî seba problemanê ekonomî û feqîrîye weşîya xo îhmal kenê. Seba feqîrîye weşîya xo taloq kenê. Ez 10 serrî verê cû bi nêweşîya kanserê çiçikan kewta. Labelê mi fam kerd ke mi xo zaf îhmal kerdo.”

 

‘Xoresnayîşê xizmetê weşîye problemo pîl o’

 

Melahat Durmaza dîyar kerd ke xoresnayîşê hacetanê hîjyenî, awa pake çin a û wina va: “Feqîrîye rasterast tesîrê weşîya cinîyan kena. Vernîya caardişê Hekîmîya Keyeyî, merkezê weşîye yê dayîk û tutan estbîyî û ma tax bi taxe, keye bi keye gêrayêne û ma xizmet berdêne cinîyan rê. Nê aşîyî seba cinîyan muhîm bî. Hema zî muhîm ê. Labelê xizmetê weşîye yê nika ra zafê cinîyan seba feqîrîye feyde nîgênê. Mîsal seba kontrolê bîyayîşî zî nê xizmetî bi pere yenê kerdene. Verê cû bêpere bî û cinîyan seba ke şerm kerdêne nêameyêne. O wext ma dosya amade kerdêne. Ma venga dayîkan dayîne. Ma kontrolê înan kerdêne.”

 

‘Ganî paştîdayîşê sîgorta bidê cinîyan’

 

Melahat Durmaza dîyar kerd ke pedê hîjyenîkî zî bêpere nêdanê cinîyan û wina peynî ard: “Ganî dewlete sîgorteyê heme cinîyan virazo. Cinîyî ke pereyê înan çin o, karkerê keyeyî yê, nêeşkenê xo biresnê xizmetê weşîye. Cinîyî bi serran o seba ke serê bendenê xo de wayîrê heqê qiseykerdişî bibê xover danê. Nêeşkenê xo biresnê xizmetê weşîye.