MERKEZÊ XEBERAN- Tepişteya sîyasî Mahşad Keşana ke Zîndanê Dolatabadî yê Îranî de hucreyê yew kesî de ameye bicakerdiş, dimayê ke weşîya aye bîye xirabe berdî Nêweşxaneyê Modares Psikîyatrî.

 

Dîyar bî ke tepişteya sîyasî û wendekara 22 serrî Mahşad Keşana ke Çeleyê 2025ine ra nata zîndan de ya, dimayê ke Zîndanê Dolatabadî yê Îsfahanî de hucreyê yew kesî de ameye bicakerdiş, weşîya aye bîye xirabe û aye berdî Nêweşxaneyê Modares Psîkîyatrî.

 

Goreyê çimeyanê heqanê merdiman, pêwa ke cezaya aye qedîyaya zî, Mahşad Keşane hucreyê yew kesî de ameye bicakerdiş û aşmêke hucre de ameye verdiş.

 

Dîyar bî ke nê wextî de problemê cidî yê psîkolojîkî Mahşad Keşane de peyda bî û goreyê tayê çimeyan, hewl da ke zirar bido xo.

 

Keyeyê Mahşad Keşane endîşeyê xo yê weşîya aye ser o ardî ziwan û waştî ke heqê muhakemekerdişê adil aye rê bêro dayîş.