Şehrîban Aslan

 

AMED - Goreyê belgeyanê dozgerîye, qeydanê rakewtişê nêweşxaneyî û dayeyê LOGî yê Gulistan Doku bi hawayêk profesyonel sîstemî ameyî berdiş. Semedê tespîtkerdişê ke kamî qeydan berdê zî şîrketê Sisoftî ra agahî ameyî waştiş.

 

Her roje detay û agahîyê neweyî dewaya Gulistan Dokuye ya wendekara Zanîngeha Dêrsimî ya ke ameye vînîkerdiş de yenê bidestkerdiş. Cipersayîşê ke hetê dozgerîye ra serra 2025ine de ame kerdiş de vejîya orte ke Gulîstan Doku verê vînîbîyayîşê xo qeydê aye yê ke Nêweşxaneyê Dewlete yê Dêrsimî de sîstemê sisoftî de ameyî qeydkerdiş beno ke mudaxele înan ser o ameyo kerdiş û ameyî berdiş. Derheqê nê qeydan de dozgerîye cipersayîşêk hîra da destpêkerdiş ke kes yan kesanê ke qeydan berdî û Sisoftî ra agahî waştî bêrê tespîtkerdiş. La dîyar bî ke şîrket hema cewab nêdayo.

 

Bi berdişê qeydan waştî ke vajê ‘nêameya nêweşxane’

 

Derheqê berdişê qeydê nêweşxaneyî yê Gulîstan Dokuye de, dozgerîye 12ê teşrîna peyêne 2020ine de serdoktorê nêweşxaneyî yê ê demî, Çagdaş Ozdemirî ra agahî waşt. Ozdemîrî cewab da: “Tespît bîyo ke aye 31ê çeleyê 2019ine de nêkewta nêweşxaneyê ma û belgeyê ke îspat kenê ke aye heta ê demî derman girewta, nê nameyî dir girêdayeyê.”

 

Şîrketê va ‘bi hawayêk profesyonel ameyî berdiş’

 

Dima ra dozgerîye şîrketo ke nika berpirsîyarê sîstemê qeydanê Nêweşxaneyê Dewlete yê Dêrsimî yo, agahî waşt. Şîrket wina cewab da: “Mîyanê 31ê çeleyê 2019ine û 31ê qanûna 2020ine de, Sisoftê Nêweşxaneyê Dewlete yê Dêrsimî de xizmetanê Sîstemê Îdarekardişê Agahîyanê Nêweşxaneyî (HIMS) kerdî. Her çiqas lazim bo ke qeydê semedê dayîşûgirewtiş mîyanê sîstemê HIMSyî de bibo zî nêbîyayîşê qeydan nê tarîxan semedê verpay kerdê. Ma tespît kerd ke nê qeydanê nê sîstemî, bi taybetî yê nê rêzê tarîxan ra, bi zanebîyaye bi xebatêk profesyonel û hîra ameyê berdiş. Eynî hawa, ma bawer kenê ke sebebê nêbîyayîşê qeydan no yo ke ê netîceya xebatêk profesyonel û hîra ke demê Sisoftî de ameye kerdiş de ameyî berdiş. Tu îhtîmalêk çin o ke qeydî ameyî berdiş bêrê agêrnayîş. Sewbîna, sîstem de qeyd semedê tarîxê verê û dimayê tarîxê dîyarkerde est ê. Ma zî bala dozgerîye ancenê na rastîye ser ke qeydê sîstemî yê ameyî berdiş tarîxê ke Gulistan Doku goreyê sîstemê POLNETyî muracatê nêweşxaneyî kerda pê kenê.” Şîrket waşt ke nê qeydî Sisoftî ra bêrê persîyayîş.

 

Ancî dozgerîye waşt ke qeydê derheqê Gulîstan Dokuye yê 31ê çeleyê 2019ine û yê 7ê kanûna 2020ine û 9ê kanûna 2020ine yê ameyî berdiş bêrê cipersayîş û tespîtkerdişê nasnameyî dir dozgerîye rê bêrê şirawitiş.

 

La yeno zanayîş ke şîrketê Sisoftî dozgerîye rê heta nika tu cewab nêdayo.