MERKEZÊ XEBERAN - Roniştoxê bajarê Kobanê semedê 11ine serrgêra qetlîamê Kobanê û 6ine serrgêra qetlîamê Helinceyî rayîrşîyayîşêk girseyî pê ard.

 

Çeteyê DAIŞî 25ê hezîrana 2015ine de qetlîamêk hovane bajarê Kobanê û dewanê ci de pê ard ke netîceya nê de zêdeyêr 200 tutî, cinî û pîrî ameyî qetilkerdiş. Eynî aşme de 23ê 2020ine de dewleta tirke bi teyareyêk bêmerdimî qetlîamêk dewa Helinceyî de pê ard ke îdarekarê Kongra Starî Zehra Berkel û Hebûn Xelîl, sewbîna dayîka Emîne Weysî qetil kerd.

 

Ewro Kongra Star semedê serrgêra her di qetlîaman rayîrşîyayîşêk girseyî organîze kerd. Bi seyine cinî û şarê Kobanê tewrê rayîrşîyayîşî bîyî. Rayîrşîyayîş dewa Helinceyî ya Rojhelatê Kobanî ra dest pêkerd û cayê hedîseya qetlîamê Helinceyî de vindertî.

 

Cinîyan bêmabêne sloganê “Şehîd Namirin” û “Jin Jiyan Azadî” berz kerdî û vernîya cayê hedîse de sozê xo ancî newe ra kerdî. Hemsereka Meclîsê Keyeyê Şehîdan Sara Xelîl rayîrşîyayîşî de qisey kerd û qetî kerd ke ê bêmabêne do yadê hemrêyanê xo gane biverdê û keda înan biresnê serkewtişî.