Gulîstan Gulmuş

 

RIHA - Pispora Tarîxî ya Misirî û akademîsyene Sahar Hesen derheqê prosesê “Aştî û Cimatê Demokratîkî” ya ke Rayberê Şarê Kurdî Abdullah Ocalan da destpêkerdiş de qisey kerd û va ke serkewtişê prosesî do semedê heme Rojhelatê Mîyanênî aştî bîyaro û va: “Lazim o ke muzakeranê bînî zî qerardarîyêka samîmî nîşan bidê.”

 

Krîzanê herêmî, polîtîkayê şerî û waştişanê şaran ê ke cewabê xo nêgînê, Rojhelatê Mîyanênî de cigêrayîşêko sîyasîyê newe bi xo ra ano. Herême de vera pêrodayîşan munaqeşeyê dîyalog û demokratîkbîyayîşî vejîyenê vernî û perspektîfê Rayberê Şarê Kurdî Abdullah Ocalanî yê “Aştî û Cimatê Demokratîkî” zî mîyanê nê munaqeşeyan de yê.

 

Pispora Tarîxî ya Misirî û Akademîsyene Sahar Hesen derheqê prosesê “Aştî û Cimatê Demokratîkî” û tesîrê ci yê Rojhelatê Mîyanênî de qisey kerd.

 

‘Serkewtişê prosesî do bi meseleya kurdî sînordar nêmano’

 

Sahar Hesen derheqê têkoşînê şarê kurdî û prosesê “Aştî û Cimatê Demokratîkî” de qisey kerd û va: “No proses eynî wextî de; demokratîkbîyayîşê zafhetîye teşwîq keno, kulturê cîyayan dano naskerdiş û mîyanê heme şaran de edalet, têduştî û cuya hembeşî esas gêno û semedê çareserîye berpirsîyarîyêk tarîxî bar keno. Prosesêk ke Rojhelatê Mîyanênî de şer dewam keno de hewldayîşê “Aştî û Cimatê Demokratîkî” yê Abdullah Ocalanî, vîzyonêk alternatîf ê xo seperneno aştîye, demokratîkbîyayîşî pêşkêş kerd. Eke no proses bireso serkewtiş do tesîrê ci tena bi meseleya kurdî sînordar nêmano.”

 

Sahar Hesen eşkera kerd ke eke no proses serkewte bo do bi rayîrê dîyalogî modelêk bêro awankerdiş û wina va: “Serkewtişê nê prosesî do armancê aktoranê teberî zî sînordar bikero. Netîce do îlhamê hewldayîşanê bînan ê Rojhelatê Mîyanênî bido. Do paştîdayîşê awankerdişê sîstemêk herêmî yê aştîyane û demokratîkî bikero.”

 

‘Lazim o ke heme hetî qerardarîyêk samîmî nîşan bidê’

 

Sahar Hesen qiseykerdişê xo de wina va: “Dewamkerdişê tepiştişê Abdullah Ocalanî munaqeşeyê derheqê ameyoxo meseleya kurdî de, îhtîmalê aştîye yê Rojhelatê Mîyanênî sey meselayêk sîyasî dewam keno. Lazim o ke heme hetî muzakere û dîyalog de qerardarîyêk samîmî nîşan bidê. Aştî tena bi rayîranê leşkerî mumkin nîya, no proses bawerî, îrade û zerrîwazî wazeno. Reformê demokratîkî ferzê. Semedê aramîya Rojhelatê Mîyanênî lazim o ke heme aktoranê esasî yê prosesî şertê têduştî de muzakere bikerê.”