ANQARA - Cinîyan dîyar kerd ke aştî tena bêvengbîyayîşê çekan nîyo û vatî: “Mîyanê sîstemê cimatî de goreyê meqam û erjanê merdimayîya mîyanneteweyî û hukmanê mîyanneteweyan aştî şena bêro tesîskerdene.”

 

Prosesê "Aştî û Cimata Demokratîke" yo ke bi vengdayîşê Rayberê Şarê Kurdî Abdullah Ocalanî ra ame destpêkerdene; cinîyî, temsîlkarê dezgehanê cimatê sivîlî û pawitoxê heqan dîyar kenê ke aştiyêka xurt û daîmî bi gamanê demokratîkbîyayîşî bena. Pêwa nê yeno vatene ke no proses tena sey babeta ‘asayîş û bêçekbîyayîşî’ nêşeno bêro erjnayene û no zî xizmetê aştiya cimatî nêkeno.

 

Pawitoxanê heqanê merdiman ra Gunselî Kaya û Ayşe Bakkalcî dîyar kerd ke aştî tena bêvengbîyayîşê çekan nîya; bi azadîya fikr û fehmî, hukm de wedaritişê zextan û bi caardişê hukmanê qanûnî yê mîyanneteweyan şena pê bêro.

 

‘Aştî bi viraştişê derûdorêko demokratîk bena’

 

Gunselî Kaya da zanayene ke derûdorê aştiye tena bi bêvengbîyayîşê çekan nêbeno û wina dewam kerd: “Awankerdişê derûdorê aştiye; azadîya fikr û fehmê merdiman, qebûlkerdişê azadîya munaqeşekerdene û wedaritişê zextanê hukmî yo. Aştî bi viraştişê derûdorêko têduştî û demokratîk bena.”

 

‘Dewlete tu rey heqanê demokratîkan sînîya zerdîne de nêdana’

 

Ayşe Bakkalcî eşkera kerde ke ganî demokrasî mîyanê tekelê tu kesî de nêbo û semedê na yewne zî vengdayîşê têkoşînêko feydedar kerd. Ayşe Bakkalcî wina dewam kerd: “Dewlete tu rey heqanê demokratîkan sînîya zerdîne de nêdana ma. Ma ewnîyenê kitabanê tarîxî ra, sey çîyo ke mojneno ma, ma cimatêk ke edetê têkoşînî ra yenê, nîyê. Ma cimatêk ke wayîrê hişmendîya awe ya nîyê. Komara demokratîke yena qiseykerdene. Ez bawer nêkena ke na pê bêro. Na tena bi têkoşînî şena bidest bêro kerdene. Ganî ma dewlete ra mepawê.”

 

‘Cimat aştîye wazeno’

 

Ayşe Bakkalcî bala ante serê zextanê demê peyênî yê ke mûxalîf, hunermend û komedyenan ser de yenê kerdene û eşkera kerd ke semedê mûxalîfan heqê cuye nêyeno nasnayîş û wina peynî ard: “Ganî cinîyî têkoşînê xo bidominê. Ganî binpaykerdişê heqan rojeve de bêro verdene. Zêdeyêrê cimatî aştiye wazeno. Ganî heqê ma yê tebîî nêrê xespkerdene. Nê hetî de ganî ma hewl bidê. Ganî her kes bi hawayêko azad têkoşîn bikero. Ma cimatêke ke tede edalet û huqûq est o wazenê.”