Neslîhan Kardaş

 

ŞIRNEX - Semra Yildiz a ke dewa Melê de ciwîyena, no 10 serrî yo bi berardişanê keda destan ekonomîya xo bidest kena.

 

Semra Yildiz a ke bajarokê dewa Melê yê Şirnexî de ciwîyena, 17 serrîya xo ra heta nika bazinê destan viraznena. Bazinê ke bi kedêk pîl yenê viraştiş û her rengê înan de hîkayeyêk est ê, bi destê Semra Yildize gane benê. Cinîya ciwan a ke bazinê xo bi la û mûranê rengînan mûnena, eynî wextî de rengê dinyaya xo zî mûnena.

 

Semra Yildiz a ke serranê lîseyî de dest bi mûndişê bazinan kena, her şina xo aver bena û no vurnena qezencê ekonomîkî. Semra Yildiz berardişanê xo ser medyaya dîjîtale de roşena û zafê bajaran ra sîpariş yeno. Semra Yildiz bi pêşnîyazê kesanê dorûver dir berardişê cîyayan zî viraznena. Nika keyeyê xo de hacetê xemilnayîşî, tewirê xişiran viraznena, dorê laçikan zî neqş kena.

 

Semra Yildiz derheqê xebata xo de qisey kerd.

 

Zaf berardişan viraznena

 

Semra Yildiz va ke 12 serrî yo na xebate kena û wina va: "Mi bazin destê hevalanê xo de dîyêne û bala mi antêne. Dima ra mi qerar da ez viraznî. Her ke mi viraşt merdimî modelê cîyayî mi ra waştî. Ser waştişê înan ez modelê neweyî musaya. Tena bazin nê, ez tewirê bînî yê xişiran zî viraznena. Dima ra mi dest bi rotişî kerd. Qij bo zî ameyîşêk mi est o. Bajarê cîyayan ra sîparişî ameyî. Semedê ekonomîya xo qezenc kena kêfweş a. Ser medyaya dîjîtale de muşterîyê mi est ê."

 

Hebê kizwanî ra mûran viraznena

 

Semra Yildiz dîyar kerd ke verê bazin viraşta û wina dewam kerd: "Dima mi dorê laçikan zî viraşt. Mi hebê kizwanî ra mûra viraşt, nê mûran ra mi tîzbihe û bazin viraştî. No kedêk pîl wazeno. Ez kizwanan çend rojan awe de verdana, dimayê ke nerm benê bi derzî akena û kena mûra."

'Lazim o ke her cinî linganê xo ser o vindero'

 

Semra Yildiz peynîye de wina ard ziwan: "Lazim o ke cinî tu kede qij nêvînê. Belkî qij yeno dîyayîş la wexto ke mi nîya dest pêkerd, mi bazinêk 4 saetan de viraştêne. La nika saetêk de viraznena. Ez hetê ekonomîkî ra linganê xo ser o vindena. Debara xo kena. Lazim o ke her cinî linganê xo ser o vindero."