Berîtan Canozer

 

AMED - Sultan Yaşara bi serrêke û nîmo seba astengîyê qedexeyî pêvînayîşî nêeşkena şêro pêvînayîşî mêrdeyê xo û bi aşmêke yo telefon zî nêeşkenê bikerê û va: "Do kam bibo vengê ma? mêrdeyê mi merdo ya mendo ma nêzanê. Ma keyeyî ganî torra têkoşînî bimunê."

 

Seyfettîn Yaşar û Fetîh yaşaro ke hepisxaneyê Tîpê E yê Amasya de hepsîyê, bi serrêke û 4 aşmî yo bi sebebê qedexeyê pêvînayîşî nêeşkenê bi keyeyî xo dir pêvînayîş bikerê. Sultan Yaşare dîyar kerde ke tewr peyîn 25ê Hezîrana 2017an de seba pêvînayîşê roşanî şîyê Amasya pêvînayîşê mêrdeyê xo yê Seyfetîn Yaşar û va dima ra pêvînayîş nêameyo kerdene.

 

'Wextê pêvînayîşî de bi derbkerdiş berdî'

 

Sultane çîyê ke pêvînayîşê peyîn de ame cuyayîş wina qalî kerde: "Ma şî pêvînayîş, gardîyan û leşkeran heta ma girewtî zere her çî kerdî. Vatî ‘terorîst’ ameyê. Wexto ke ma kewtê pêvînayîş zî mêrdeyê mi, vistewrey mi û hepsîyê bîn zî heqaret û şîdet kerdê. Gardîyanan waştê ke cêgirayîşê viran bikerê. La hepsîyan nêverdayê û no semed ra hepsîyan derb kerdê. 20ê deqeyê pêvînayîş de gardîyanan hepsî bi derbkerdiş berdê. Ma uca ra nêşî. La ma bi zor vetî. Ma keyeyan israr kerd û ma nêvejîyayî. Ma waşt ma mudir dir pêvînayîş bikerê. La va 'wextê mi seba terorîstan çin o'. Vendayî polîsan û ma vetî. A roje ra nata ma nêşî. Ma rewşa înan nêzanê. Bi aşmêke yo telefon zî nêkenê. Ma mektuban eşrawenê peyser yenê. Kitab û cilan nêgînê zere. No îşkence yo. Ma do muracatê heme rayîrê huqûqî bidê û hesap pers bikerê. Ganî ma torra têkoşînî awan bikerê."