STENBOL - Avûkat Cansu Şekercî dîyar kerde ke zindanan de ceza kerdiş bîya sey metodî û wina va: “Pêkerdişê Heqê Domanan yê NYyî zî vano ganî tepiştiş çareya peyên bibo. Hûmara domanê hepsî welatê ma de zêde bîya. Tepiştiş sey metodê ceza vejîyeno vernîya ma. Ma vera hepskerdişê domanan de yî.”

 

Temsîlkara Torê Domananê Hepsî yê Komeleya Sîstemê Cezaya Înfazî de Komela Cematî ya Sîvîle (CÎSST) Avûkat Cansu Şekercîye bi wesîleya 20 Teşrîna peyêne Roja Heqê Domana ya Dinya qisey kerde û bale nate zêdebîyayîşê hûmara domanê hepsîyan ser.

 

Cansuye qiseykerdişê xo de dîyar kerde ke goreyê îstatîstîko ke Wezîrîya Edaletî aşkera kerd nizdîyê 3 hezar û 13 domanî zindanan de yî û 743 domanê ke hema mabenê 0-6 aşman de yî tewrê dayîkanê xo zindanan de yî.

 

'Keyeyê domanan zehmetî ancenî'

 

Cansuye ard ziwan ke Anqara, Îzmîr, Amed, Qeyserî, Tarsus û Hataye de pêro pîya 7 hepsîyê doman estî û Elezîz, Anqara, Stenbol û Îzmîrî de pêro pîya tena 4 Keyeyê Perwerdeyî yê domanan estî. Cansuye daye zanayene ke seba ke zindan domanan cayê dîyarkerde de yî keyeyê domanan wexto ke şonê pêvînayîşê zindanan zehmetî ancenî.

 

'Îşkence û kerdişê xirab yenî kerdiş'

 

Cansuye qiseyekrdişê xo de wina va: “Problemê hepsîyê domanan ra yew oyo ke raştê cezaya dîsîplînî yê kêfî yenî. Heqê weşî yê hepsîyan bi zînor î. Kapasîteya xebatkarê zindanî nêeşkenî lazimîyanê hepsî û zindanî bi ca bîyarî. Îşkence û kerdişê xirab yenî kerdiş.”