Rojda Aydin

 

MÊRDÎN - Dayîka Gule Hamdiye Kiliça ke dewa Zonê ya Artûklu ya Mêrdînî de ronişena reaksîyon nîşan daye serbest veradîyayîşê kesê şikinan û îdîa kerde ke kênaya aye întîhar nêkerda û ameya kiştene.

 

Gul Karataşa (35) ke dayîka 3 domanan bîye û dewa Duzova ya qezaya Çinarî ya Amedî de roniştêne 11 teşrîna peyêne de hetê di kesê ke nameyê înan nîno zanayene bi hawayo birîndar ronîya Nêweşxaneyê Dewlete yê Çinarî. Nêweşxaneyê Dewlete yê Çinarî zî seba ke rewşa Gule xeylê giran bîye aye sewqê Nêweşxaneyê Perwerdeyî û Cigêrayîşî yê Gazî Yaşargîlî yê Amedî kerd û Gule ewja de cuya xo vindî kerde. Keyeyê Gule îdîa kerd ke nêweşxane raporê otopsî nêdayo înan, Gule bi hawayo sîstematîk raştê şîdet ameya û hetê merdeyê xo ra ameye kiştiş. Hedîse ra dima mêrdeyê Gul, Salîh Karataş û birayê ci Ozcan ameyî tepiştiş. Kesê ke ameyî tepiştiş bi îdîaya ‘delîl kêmî yî’ serbest veradîyayî. Dayîka Gule Hamdiye Kiliça ke dewa Zonê ya Artûklu ya Mêrdînî de ronişena reaksîyon nîşan daye serbest veradîyayîşê kesê şikinan û îdîa kerde ke kênaya aye întîhar nêkerda û ameya kiştene.

 

'Keyeyê Karataşî ra kesêk daxî nêame'

 

Hamdiye Kiliçe dîyar kerde ke keyeyê Karataşî ra kesêk daxî înan nêgêrayo û tena keyayê dewa Duzovaye înan gêrayo û vato ‘kênaya şima întîhar kerda’ û wina domnaye: “Keya dîyar kerd ke kênaya ma nêweşxane de ya. Ma nêresîyayî kênaya xo ser û cenazeya aye dayî ma. Ma cenaze dewa xo de defin kerde. Keyeyê Karataşî ra kesêk daxî ma nêgêra û nêame cenaze.”

 

‘Salîh û Ozcan wazenê mi bikişî’

 

Hamdiye daye zanayene ke kênaya aye 10 serrî verê cû zewecîyaya û va: “Kênaya mi timî vatêne ‘ez înan vera nêeşkena vejîya teber.’ Demserrê hamnanî de daxî kênaya mi nêvetêne teber. Birayê Salih, Ozcanî reyêk çek dabî sereyê kênaya mi. Kênaya mi qala hedîse kerde û va ‘Salîh û Ozcan wazenê mi bikişî.’ Wexto ke wina qisey kerdêne telefon ame girewtiş. Lajê mi derheqê Salîh û Ozcanî de muracatê gere kerd û ameyî tepiştiş. Labelê muhakemekerdiş ra ver bi mehneya ‘delîl kêmî yî’ serbest veradîyayî.” 

 

'Bedenê kênaya mi ser de herindê derban'

 

Hamdiye daye zanayene ke bedenê cenazeya kênaya aye ser de herindê derban estbî û va: “Badê ke ma cenaze şîte, mi rîyê kênaya xo heta qirica aye akerde. Rîyê aye de herinda derbî çin bî. Eke kênaya întîhar kersa se çi ra herindê întîxarî çin bî? Doktor mi rê va ke tay kesî kênaya to derb kerdî û peynîya sereyê aye de herinda derban estî. Qirika aye de herinda derban est bî. Bellîbî ke pê çîyêk dayî peynîya sereyê kênaya mi ro.” 

 

'Wa Salih û birayê ci Ozcan bêrî cezakerdiş'

 

Hamdiye qiseykerdişê xo yê peyênan de wina va: “Kênaya mi hetê kesêk ra nê hetê di kesan ra ameya qetilkerdiş. Ma raporê otopsî waşt, la nêweşxane nêda ma. Keyeyê Karataşî wazeno hedîse bigîro. Cepxaneyêk çekê înan estî. Eke lazim bikero wa kênaya mi mezel ra vejî û otopsî bikerî. Ez bawer nêkena ke kênaya mi xo kişta. Roja ke kênaya mi merde serê sibayî mi gêra û tay çîyan waşte. Vengê aye baş bî. Salih û birayê ci Ozcanî plan kerdî û kênaya mi kiştî. Saetê şewe 9î de xeber dîya ma. Ez wazena sucdar bêrî cezakerdiş û muhakemekerdiş. Cuya kênaya mi sîya kerdî. Ma sucdaran baş zanê. Sucdar Salih û Ozcan î. Zerrîya mi vêşaye wa zerrîya sewbîna kesêk nêvêşa. Torinê mi hetê înan de yî. Beno ke zirar bidî înan zî. Ez fek doza xo ra vera nêdana.”