Gulîstan Azak

 

AMED - KESK hemverê krîzê ekonomî, betalî û binpaykerdişê kede de bi siloganê ‘Bedêlê krîzî kedkar nê, wa kesî ke bîyî sebeb bidî’ do 16ê kanûne de Raşteyê Îstansyonî yê Amedî de mîtîng pê bîyaro.

 

Konfederasyonê Sendîkaya Kedkaranê Rayapêroyî (KESK) hemverê krîzê ekonomî, betalî û binpaykerdişan de bi siloganê ‘Bedêlê krîzî kedkar nê, wa kesî ke bîyî sebeb bidî’ do 16ê kanûne de Raşteyê Îstansyonî yê Amedî de mîtîng pê bîyaro. Yeno pawitiş ke Sêrt, Êlih, Wan, Riha, Bedlîs, Dêrsim, Semsur, Şirnex, Elezîz, Muş, Mêrdîn û Çewlîkî ra xeylê kesî seba tewrbîyayîşê mîtîngî bêrî Amed. Cinîyê KESKî seba terbîyayîşê mîtîngî veng dayî.

 

Derheqê babete de Sekretera Cinîyan ya Sendîkaya Kedkaranê Bûroyî (BES) ya Amedî Serap Kiliçe qisey kerd û va: “Mîtîng bi ortaxîya DÎSK, TMMOB, TTB û rêxistinê ked û pîşeyî do pê bêro. Ma do mehverê butçeya şer û rantî de vengê xo berz bikerî. Talebê ma meşru û heq î. Krîz û enflasyonê berzî de heqê ma ameyî binpaykerdiş. Ganî vînîkerdişê ma tepîya bêrî herînayîş. Seba xebatkaran pêkerdişê komî ame îmzekerdiş. No zî tesîrê xo da maeşanê ma ser.”

 

'Cinî raştê bêhuqûqîyanê cidî yenî'

 

Serape dewamê qiseykerdişê xo de ard ziwan ke demê peyênan de taybet hemverê cinîyan de xespkerdişê heqan zêde bîyî û cinî destûrê şit û welidnayîşê domanan de raştê bêhuqûqîyanê cidî yenî. Serape wina dewam kerde: “Zextê ke ameyî ferzkerdiş reyde hewl dîyeno ke cinîyan hepsê keyeyan bikerî. Hukmat bi vatişê ‘Wa cinî biewnî domananê xo û nîme roje bixebetî’ seke mîzgînî bido, çapemenî reyde pare kerd. Hedefê înan oyo ke cinîyan heme raşteyê karî ra dûrî bikerî. ganî ma seba heqanê xo mîtîngan de ca bigêrî.”

 

'Tewr zêde keda cinîyan yena binpaykerdiş'

 

Hemsereka Sendîkaya Kedkaranê Xizmetê Sosyal û Weşîye (SES)ya Amedî Gonul Adibellîye zî qiseykerdişê xo de dîyar kerde ke seba ke heme kesî hemverê binpaykerdişan de vengê xo berz bikerî, ganî tewrê mîtîngî bibî û wina domnaye: “Kesê ke tewr zêde keda înan yena binpaykerdiş cinîyî û ganî taybet cinî raşteyê mîtîngî de cayê xo bigîrî.”

 

'Ganî biherikî raşteyan û vengê xo berz bikerî'

 

Sekretera Cinîyan ya Hûmara 1. ya Egîtîm Senî ya Amedî Zeynep Aykate zî qiseykerdişê xo de bale ante binpaykerdişê kede ser û daye zanayene ke ganî heme kes hemverê faturaya krîzê ekonomî ke şarî rê yena birnayîş biherikî raşteyan û vengê xo berz bikerî.