Safiye Alagaş

 

STENBOL- Aylîn Serînpinara ke vera hacetê kahn bi meraq a, Balat de kuçeyêke de dikanêke bi nameyê ‘Sandik kurdu’ akerde. No dikan hetê welatîyê ke kuçe ra derbaz benê eleqeyêke pîl vîneno û dikan de xeylê vîrardiş zî estê.

 

Aylîn Serînpinara ke Stenbol de ameya dinya û pîl bîya 1982an de sey karmend PTTî de dest bi kar kena û dimayê teqawîtbîyayîşî no dikanî akena. Aylîne wina vana: "Ez karmend bîya. Dimayê ke teqawît bîya mi waşt ez çîyêke bikerî. Mi waşt ez bazarwanî zî bikerî. La o karê bi ekîb beno. Mi her wext hacetê kahn hes kerdêne û mi objeyê qij kom kerdêne."

 

'Ez bîya wayîrê dikan'

 

Aylîne da zanayîş ke 5 serrî verê beşdarê mezatan bîya û wina va: "Mi mezatan ra hacet girewtêne. Mi taxa xo de dikanêke girewt. Mi bi xêrê înternetî hacetan rot. Hîn hacetî estbî ganî biameyne tamîrkerdiş, pakkerdiş. Dimayê ke ez dikan gêna, ez şina mezat. Kesê ke demê verî hez kenê nê hîsgêrî baş zanê. Ez zaf hewl dana ke xişirê serrê 60î, 70 û 80an kom bikerî. Wexto ke hacetêke mitbaxe ra vejîno, beno ke reyan parçeyê ci kêm bê. Ya zî şiknaye bê. Hacetê kahn erjan ê. Hacetêke bi 50 TL yeno girewtiş, siba beno bi 100 TL bêro rotiş. Temaşekerdişê hacetê kahn mi kêfweş keno. Ez înan pak kena, viraznena û tamîrê înan kena."

 

Aylîne tewr peyîn qiseykerdişê xo de veng da cinîyan ke ganî xo kifş bikerê û her kes ganî karê ke ci ra hes keno bikero.