Dîlan Babat

 

ENQERE - Datkênayê parlamentera HDPî ya Colemêrgî û Hemsereka KCDî Leyla Guvene ke 63 rojî yo ke grevê vêşanî de ya, qisey kerdî û girîngîyê ke Leylaye daya têkoşînê cinîyan qalî kerde. Datkênayê aye wina vatî: "Ca ame serê herra xo de têkoşîn da. Wext ame aye meclîs de têkoşîn da. Bî vengê kesê ke rastê zulmî ameyê. Aye cesaret û hêz da ma zî."

 

Parlamentera HDPî ya Colemêrgî û Hemsereka KCDî Leyla Guvene bi amancê tecrîdê serê Rayberê PKKî Abdullah Ocalanî bêro wedartiş dest bi çalakîya grevê vêşanî kerde û çalakîya aye roja 63in de ya. Maya Leyla Guvene, Cevriye Guvene 4ê Çele de cuya xo vindî kerde.

 

Datkênaya Leylaye, Nurîye Mermere dîyar kerde ke Leylaye domanîya xo ra têkoşer bîya û wina va: "Cinîyêke xo bawer a. Zaf xebatker a. Serê linganê xo de vinderte. Ramojna ke ganî heme cinî têkoşîn de ca bigîrê. Bi tena sereyê xo domananê xo pîl kerde. Kes ra hetkarî nêwaşt. Leylaye hewl da ke biba vengê cinîyan. No zî heme cayen de ramojna. Cesaretêke pîl da ma zî. Ramojna ke bê camêrdan cinî eşkenê serê linganê xo de vinderê. Ramojna ke ma cinî eşkenê bi tena sereyê xo bicuyê. Leyla şerwan a, şorişgêr a. Her warî de têkoşîn da. Wext ame serrê herra xo de, wext ame meclîs de têkoşîn da. Bî vengê cinîyê ke rastê zulmî ameyê. Ma verê Leyla de yê. Ganî dewlete waştişanê ma bi ca bîyara."

 

'Her wext bî çareserî'

 

Datkênaya Leylaye, Meral Koçyîgîte zî arde ziwan ke Leylaye cinîyêke zaf xurt a û şerê aye vera cu her wext dewam kerdo û wina va: "Leyla her wext bî hêzê çareserî. Rojêke Leyla amî keyeyê mi. Mi zî va 'vera ke ti ê cayan de geyrena, biewnî maya xo ra'. Huya û va, 'şima heme ewnîyenê maya mi ra. Ez seba înan têkoşîn kena. Coka lazimîyê cinîyan bi mi esto'. Coka waştişê Leylaye waştişê ma hemine yo. Ganî her kes veng bido vengê Leylaye. Ganî waştişê ma bilezgînî bi ca bêrê."