NAVENDA NÛÇEYAN - Endama Navenda Lêkolînên Jineolojiyê Nagihan Akarsel li Silêmaniyeyê hat qetilkirin. Jinan bertek nîşanî qetilkirina Nagîhanê dan û gotin: “Em vê zîhniyetê dizanin û nas dikin.” 

 

Endama Navenda Lêkolînên Jineolojiyê, edîtora Kovara Jineolojiyê û rojnameger, nivîskar û akademîsyen Nagihan Akarsel li bajarê Silêmaniye yê Herêma Federal a Kurdistanê li pêşiya mala xwe di encama êrişeke çekdarî de hat qetilkirin. 

 

Rêxistinên jinan, rojnameger û siyasetmedaran li ser hesabên xwe yên medyaya civakî bertek nîşanî qetilkirina nagîhanê dan. 

 

TJA: Hûn nikarin pênûsa heqîqetê bêdng bikin 

 

Tevgera Jinên Azad (TJA) têkildarî qetilkirina Akarsel ev peyam parve kir: “Rêhevala me #NagihanAkarsel ji bo ku rastiya heqîqeta jinan a di tarîtiyê de mayî, ji bo ronîkirina zanyariya jinan a winda û ji bo derxistina heqîqetê bi salan e têdikoşiya. Rêhevala me îro li Silêmaniyeyê ji hêla dewleta tirk ve hat qetilkirin. Hûn nikarin pênûsê heqîqetê bêdeng bikin!” 

 

'Em soza têkoşînê ddin' 

 

Meclisên Jinan ên Kongreya Demokratîk a Gelan (HDK) jî qetilkirina Akarsel şermezar kir û wiha got: “Edîtora Kovara Jineolojiy û Endama Navenda Lêkolînên Jineolojiyê #NagihanAkarsel ku têkoşîna azadiya jinê dida, li Silêmaniyeyê di encama êrişeke çekdarî de hat qetilkirin. Em vê êrişê şermezar dikin û soz didin ku dê têkoşîna azadiyê ya jinan û piştevaniyê mezintir bikin!” 

 

'Êrîşeke nameerdane ye' 

 

Jinên ku Pêşerojê Dirêsin (Women Weaving Future) jî da zanîn ku Akarsel yek ji organîzatorên konferansa jinê bû û wiha got: “Em vê êrişa bi alçaxî şermezar dikin û soza mezinkirina têkoşînê didin.” 

 

Her wiha Cîgirê Hevserokê Giştî yê Partiya Demokratîk a Gelan (HDP) Tayîp Temel jî bertek nîşanî qetilkirina Akarsel da û wiha got: “Em vê êrişa bi alçaxî şermezar dikin.” 

 

'Şopên faşîzmê hene'

 

Parlamentera HDP’ê û Federasyona Meclisên Sosyalîst (SMF) Dilşat Canbaz jî têkildarî qetilkirina Akarsel ev peyam parve kir: “Di cînayetên bi vî rengî yên li herêma Kurdistanê de şopên faşîzma AKP-MHP’ê û şirîkên wan ên sûc ên li herêmê heye.” 

 

'Em vê zîhinyet nas dikin'

 

Endama Meclisa Jinan a Partiya Herêmên Demokratîk (DBP) Siya Ayhan Akgul jî derheqê cînayetê de ev tişt anî ziman: “Qetilkirina Nagihan Akarsel, sûîqesteke li hemberî nirxên jinan ên xwe dispêrin hêza parastina cewherî ya jinan ku li dijî pergala desthilatdariya faşîst a berhema mejiyê mêr e. Em vê zîhniyetê dizanin û nas dikin.”