NAVENDA NÛÇEYAN - Mujgan Hesenpur a 46 salî ya ji Lahîcanê ku ji bo serdana gora xizmên xwe çûbû goristanê, ji ber ku li hember zimandirêjiya zilamek paşverû ya li dijî cilên wê nerazîbûn nîşan da, bi 5 guleyan hat qetilkirin.

 

Di 21'ê Gulanê roja pencşemê, Mujgan Hesenpûr ji bo serdana gorên dê û bavê xwe, bi kurê birayê xwe yê 7 salî re çû goristana Lahîcanê. Lê belê, piştî çend saetan ev serdan veguherî yek ji mînakên herî asayî yên tundiyê yên bi hîcaba mecbûrî ve girêdayî.

 

Nîqaşa li ser cil û bergan

 

Li gorî agahiyên hatine belavkirin dema ku Mujgan li goristana Hesenpûrê bû, zilamekî çekdar rexne li cilên wê kir û jê re got “bala xwe bide ser hîcaba xwe.” Li gorî agahiyan, Mujganê bersiva “Cilên min meseleyeke şexsî ne û yên din eleqedar nakin” da. Li gorî şahidên bûyerê, nîqaş gur bû û êrîşkar berê çeka xwe da ser wê. Lê belê li şûna ku paşve gav bavêje, Mujgan nerazîbûna xwe bi qêrîn domand. Li gorî gotinan, hewldana yekem a êrîşkar a gulebaranê bi ser neket û çeka wî asê ma; li ser vê yekê ew kes demeke kin ji cihê bûyerê derket û çû.

 

Vegera êrîşkar û guleyên kujer

 

Li gorî gotinên şahidan piştî ku çekdar çû, hin kes li pey wî çûn. Lê belê çend deqe şûnda, êrîşkar vegeriya goristanê û vê carê 5 gule li Mujgan Hasanpur reşand û paşê bi lez û bez reviya. Piştî êrîşa çekdarî li goristanê panîk û gelimşe çêbû. Kesên li cihê bûyerê, hewl dan ku alîkariya Mujgan bikin berî ku tîmên bijîşkî werin. Mujgana ku bi giranî birîndar bû, rakirin nexweşxaneyê. Li wir berî ameliyatê destwerdana lezgîn lê hat kirin û tevî hemû hewldanên bijîşkan jî, nehat xilaskirin.

 

Tundiya ji ber cil û bergan

 

Nûçeya kuştina Mujgan Hasanpur nîqaşa li ser aliyên civakî û ewlehiyê yên polîtîkayên hicaba mecbûrî dîsa anî rojevê. Bikarhênerên medyaya civakî bûyerê wekî mînakek din a alozî û tundiya avahîsaziyê ya ku ji ber zexta cil û bergan li ser jinan çêdibe, bi nav kirin.

 

Di salên dawî de, bi zêdebûna xwepêşandanên li dijî hîcaba mecbûrî ya li Îranê re, raporên pevçûn, tundî û zexta li ser jinan, li qadên giştî jî zêde bûne. Ev pêvajo piştî mirina Jîna Emînî û tevgera "Jin, Jiyan, Azadî" ya paşê, bêtir balê dikşîne.

 

Heta dema nivîsandina vê gotarê, rayedarên fermî tu hûrgulî li ser nasnameya êrîşkar, motîvasyona wî ya rastîn, an pêşveçûna lêpirsînê parve nekiribûn.