NAVENDA NÛÇEYAN- Heyeta DEM Partî ya Jinan, li Rojava di çarçoveya serdanên xwe de Şaredariya Gel a Hesekê, Saziya Malbat û Karên Gel û YPJ ziyaret kir.

 

Heyeta DEM Partî ya Jinan di çarçoveya gera xwe ya li Rojava de serdana saziyên li bajarê Hesekê û Yekîneyên Parastina Jin (YPJ) kir, bi berpirs, rêveber û fermandaran re civiya.

Heyet ji hevşaredara Mêrdînê ya peywira wê hat xespkirin û hevberdevka Komîteya Dîplomasiyê ya Rêveberiyên Xwecih Devrîm Demîr, hevşaredara navçeya Yenîşehîr a Amedê Safiya Akadag, hevşaredara navçeya Farqîn a Amedê Sevîm Bîçîçî, hevşaredara Tetwanê Belkîze Beştaş Epozdemîr û endama Komîteya Dîplomasiyê Rûken Demîr pêk tê.

 

Heyetê serdana Şaredariya Gel a Hesekê kir. Hevserokên Şaredariyê Seidiye Kotî û Selman El Himêdî şande pêşwazî kir, hevdîtin dûrî dezgehên çapemeniyê dewam kir. Dûre jî şandeyê taboleyek bibîranîn da şaredariyê.Her wiha heyetê serdana kar û barên malbat û şêniyan kir, bi rêveber Rohat Xelîl û cîgira wê re civiya.

 

Bi serdana YPJ’ê şandeyê gera xwe bi dawî kir. Fermandara YPJ’ê Newroz Ehmed û Berdevka YPJ’ê Rûksan Mihemed û hejmarek şervanan pêşwazî li şandeyê kir.

 

Di dawiya serdanê de her du aliyan mertal û tabloyên bibîranî dan hev.