MERKEZÊ XEBERAN - Bajaranê Lozan, Cenevre û Gossaû yê Swîsreyî de Roşanê Ziwanê Kurdkî bi panel, semîner, dersê kurdkî û deyîranê kurdkî ame pîrozkerdiş.

 

Bi wesîleya Roşanê Ziwanê Kurdkî bajaranê Lozan, Cenevre û Gossaû yê Swîsreyî de çalakî ameyî organîzekerdiş.

 

Lozan

 

Merkezê Komelê Kurdî yê Demokratîke bi wesîleya Roşanê Ziwanê Kurdkî panelêk ame organîzekerdiş. Dilber Hema moderatorî panelî rê kerd, Roşanê Ziwanê Kurdkî pîroz kerd û ard ziwan ke derbazbîyayîşê ziwanê kurdkî alfabeya Latînî ke Celadet Bedirxan serkêşî ci rê kerd, sewîyeya şorişî de yo.

 

Panel de bi kirmanckî û kurmancî pêşkêşê ame kerdiş. Panel de sînevîzyonêk kilm derheqê cuya Celadet Alî Bedirxan de ame mojnayîş.

 

Çalakî bi dersê kurdkî yê temsîlî bi peynî bî.

 

Cenevre

 

Bajarê Cenevreyî de zî pîrozbayî salona konferansî ya Mahatma Gandhî ame organîzekerdiş.

 

Sîyasetmedar Osman Çelîk û Hemsereka Enstîtuya Kurdî ya Swîsreyî Fatma Şik vernîya pîrozbayî qisey kerd û qalê tarîxê ziwanê kurdkî kerd.

 

Dimayê panelî dîwanê dengbêjan ame ronayîş. Pîrozbayî bi deyîranê Komîsyonê Kulturî dewam kerd.

 

Gossaû

 

Kurdistaniyê ke Kantona St. Gallenî zî bajarê Gossaûyî de bi eynî wesîla, bi beşdarîya nuştox Gernas Koçer semînerêk organîze kerdî.