Elfazî Toral 

 

STENBOL - Avûkate Fatma Tokmak, Eren Keskîne, dîyar kerd ke rewşa tepişteya bi nêweşîya giran Fatma her ke şino giranêr beno û vat: “Zîndanan de  binpaykerdişê heqan zêde yo û venga mûxalefetî kerd ke na babete de wayîrê helwestî bo û vengê xo berz bikero. 

 

Fatma Tokmak kanûna 1996ine de lajê xo Azado 1,5 serrî dir Bahçelîevlerê Stenbolî de ameye destbendkerdiş. Wexto ke ameye destbendkerdiş, semedo ke tirkî nêzana û açarnayox ci rê nêame dayîş, îfadeyê aye nêame girewtiş. Fatma û lajê aye Azad 23 rojan destbendkerdiş de rastê îşkence, tacîz û şîdetî ameyî. Fatma ke 3 serrî û nîm vernîya ke îfade bido, esîr ameye girewtiş û dimayê îfadeyê aye yê ewilî 3 serrî û nîm dima cezaya muebbetî ci rê ameye birnayîş. Fatma ke 10 serrî zîndan de mende, zîndan de nêweşîya qelbî kewtebî, dimayê Sazgehê Tibê Edlî (ATK) neql kerd ke nêweşîya aye ya giran est a, serra 2006ine de wexto ke dewa dewam kerdêne, serbest veradîya. Labelê serra 2010ine de cezaya muebetî ya ke dadgehe dabî Fatma, hetê Dadgeha Berzî ra ameye tesdîqkerdiş û Fatma Tokmak reyke bîn ameye tepiştiş û Zîndanê Padeye yê Cinîyan ê Bakirkoyî de ameye tepiştiş. Dimayê tepiştişê aye, Şubeyê Weqfê Heqê Merdiman ê Tirkîya ya Stenbolî ra raporê weşîye yê Fatma cigêrayîş kerdî û raporê "Nêeşkena zîndan de bimano" dîya la nêameye veradayîş. Pêwa xeylê nêweşîyê aye yê taybetî zî nêweşîya qelbî, bî 14 serrî yo nîna veradayîş. 

 

Ame zanayîş ke Fatma tewr peyîn hewteyê vîyarte de  10 rojî cezaya tecrîtî aye rê ameya birnayîş. Avûkata Fatma, Eren Keskîne hem binpaykerdişê heqê tepişteyan û hem zî rewşa Fatma ajansê ma JINNEWSî rê ercnayîş kerd.

 

Erene ard vîr ke goreyê dayeyê ÎHDyî hem zîndananê Kurdistanî û hem zî zîndananê Tirkîya de nêzdîyê hezar û 800 tepişteyê nêweşî est ê û wina vat: "Wextê peyîn de zêdebîyayîşê merdişê zîndanan de, ma rewşa tepişteyanê nêweşan başêr fam kenê. La çi heyf rojeva kesê ke xo muxalif bi name kenê de çin o. Xeylê nêweşê giranî est ê. La tîya de problemê ma yo tewr pîl ATK yo. Tibê Edlî sazgehêk dewlete yo, coka pisporê fermî bi temamî girêdayeyê îradeyê siyasî yo. Çi heyf tena goreyê waştişê îradeyê sîyasî rapor yeno dayîş. Tena ma nê, doktorê Tibê Edlî yê xoserî zî nê çî îfade kenê. Nê sebebî ra xeylê tepişteyî mirenê û zîndan ra vejîyenê. Ma nê çî  bêrûmetî pênase kenê."

 

Tepişteya nêweşîya aye girane Fatma Tokmak!

 

Erene wina dewam kerd: “Fatma Tokmak serra 1996ine de ameye tepiştiş. Fatma nê wextî de nêweş kewte û ATK zî raporê, eşkena bimano da. Fatma Tokmake gonîya aye lêşîn bîne û hewte ra reyke gonîya newe ci rê ameyîne dayîş. Ma bi pêro dosyayê raporê dermankerdişî muracatê Weqfê Heqê Merdiman ê Tirkîya kerd. Dimayê ke THÎVî pêro dosya cigêrayîş kerd, neql kerd ke Fatma Tokmak nêeşkena zîndan de bimano. Ma ancî waştişê taloqkerdişê ceza kerd.  Çi heyf ancî nêame qebûlkerdiş. Nêweşîya aye her ke şina zêde bena. Tewr peyîn cezaya hucreyê yewkesî aye rê ame birnayîş. Wexto ke ez hewteyê vîyarte şîya, a roja aye ya yewine bî ke hucreya yewkesî de bî. Fatma vat; ‘Wexto ke ez nîmeyê şewe rakewtêne, ameyî û mi berdî hucre. Hucre cayêk qij o, cayê ma yê ke ma rayîr ra şêrê çin o û des rojî cezaya min a hucreyî est a'. No zî yeno manaya mahkumkerdişê mergî yê kesê nêweşî. Semedo ke îdarekarê zîndanî cezayê wina sey heyfgirewtişî şuxilneno. Tirkîya zana ke Fatma Tokmak nêweşîya aye ya qelbî zaf giran a.”

 

'Zîndanan de nêcaardişê heqan zêde yê'

 

Erene tewr peyîn wina vat: "Çîyo ke ganî bêro munaqeşekerdiş oyo ke cezayê bi nê rengî sey navgînêk heyfgirewtişî yenê şuxilnayîş. La çi heyf  Tirkîya de sûcê ke yenê kerdiş, bi rayîrê qanûnî yenê nimitiş. Ma nê tewr zêde zîndanan de vînenê. Yê ke xo ra vanê muxalif ganî zêdeyêr hesas bê. Tenê keye û sazgehî nê çî gênê dest la na babetêka zaf muhîm a. Semedo ke her kes eşkeno siba tena semedê fikrê xo bikewo zîndan. Zîndanan de nêcaardişê heqan zêde yo. Ez venga pêro muxalefetî kena ke na babete de wayîrê helwestî bê û vengê xo berz bikerê.”