WAN - Qeyûmê Wanî projeyê “Kitabxaneyê Cinîyan” betal kerd û keştî ancî açarnayî keştîya protokolî. 

 

Qeyûmê Şaredarîya Bajarê Pîlî yê Wanî ke 15ê sibate de amebî tayînkerdiş, yew bi yew pêro projeyê derheqê cinîyan û xizmetê komelî betal kerd. Qeyûm, sey karê ewilî JINKART, Kartê Meslegî Komelî û projeyê viraştişê di tesîsê semedê cinîyan betal kerd.

 

Qeyûmî ke nê dir bisînor nêmend, xeylêk xebatê derheqê rayîr, awe, kanalîzasyon, awanî, cinî, ciwan û kulturî de zî da vindarnayîş.  

 

Qeyûmê Wanî, tewr peyîn zî “Kitabxaneyê Cinîyan” betal kerd. 

 

27ê çeleyî de çarçewaya xebatê şaredarîya cinî de keştîyêke sey “Kitabxaneyê Cinîyan” amebî akerdiş. Keştîya ke qalê xeberî bîya, verê zî hetê îdareyê qeyûmî ra sey keştîya protokolî amebî şuxilnayîş. La Şaredarîya Bajarê Pîlî ya Wanî ya DEM Partî na keştî açarnabî kitabxane û raştê eleqeyêk pîl amebî. Labelê îdarekarîyê qeyûmî nê projeyî betal kerd û keştî ancî açarnayî keştîya protokolî. 

 

Heto bîn ra, nuşteyê “Kitabxaneyê Cinîyan” yê keştîye ser zî ame pakkerdiş.