AMED -Meclîsê Ciwanan ê Amedî semedê rayîrşîyayîşê "Ma bi komelê demokratîkî ver bi azadîye rayîr ra şinê’ ke do mabêne 1-4ê Nîsane de, Amed ra heta Amarayî bêro organîzekerdiş, vengdayîş kerd. 

 

Endamê Meclîsê Ciwanan ê Partîya Têduştî û Demokrasî (DEM Partî) derheqê rayîrşîyayîşê bi sloganê "Ma bi komelê demokratîkî ver bi azadîye rayîr ra şinê" ke do mabêne 1-4ê Nîsane de  Amed ra heta dewa Amara ya Xelfetî ya Rihayî bêro organîzekerdiş, eşkerayîyêke da. Parlamenterê DEM Partîye Ceylan Akça û Bêrîtan Guneş zî beşdarê eşkerayîya awanîya DEM Partîye ya Amedî bî. 

 

Endama Koordînasyonê Cinîyan yê Meclîsê Ciwanan DEM Partîye Lorîn Aryen Turgut eşkerayîye bi kurdkî wend û endamê Meclîsê Ciwanan ê DEM Partîye Mustafa Yaşodun zi tirkî wend. 

 

Eşkerayîye de no çî ame vatiş: “Vengdayîşê Aştî û Komelê Demokratîkî’ ke 27ê Sibate de hetê Rayberê Şaran Abdullah Ocalani kerd û rejîmê tecrîdî ke 43 aşmî yo hewl yeno dayîş ke bêro dewamkerdiş, rijna û hêvî da pêro şar û komelê bindest û bi taybetî şarê Kurdistan û Tirkİya û prosesêk newe ame  destpêkerdiş.

 

Vengdayîşê Aştî û Komelê Demokratîkî semedê pêro beşê komelî serdemêk newe yê xoverdayîşî pênase keno û venga her kesî keno ke bibê awankerdoxê cuya ke esasê azadîya welatî bêro qebûlkerdiş.  Serê rayîrê cuyêka newe ya bi rûmet, ma sey ciwanî, hêzê serkêş û xoverdayox ê komelî ma do  bi xeta xo ya bîrdozî û çalakîye ya iyê tewr xurt beşdarê nê vengî benê. Ma venga şarê xo danê ke bi sloganê ‘Ma bi Komelê Demokratîkî ver bi azadîye rayîr ra şinê’. Bêrê ma pêro 1ê Nîsane de  Amed ra heta Amara rayîr ra şêrê û bibiê serkêşê cuya bi rûmet!”