Nazlican Nûjîn Yildiz

 

ÎZMÎR - Hemsereka Şaxa ÎHD'yî ya Îzmîrî Zîlan Gumuş, derheqê binpaykerdişê heqan yê zîndanan yê tepişteyanê nêweşan de qisey kerd û dîyar kerd ke bi taybetî zîndanê asayîşê berzî de heqê cuye yê tepişteyan binpay kenê û ganî lezkî zîndanê winasî bêrê padayîş.

 

Polîtîkaya tecrîdî ya zîndananê Tirkîya û Kurdistanî bi taybetî zîndanê Îmraliyî dewam kena. Semedê tecrîdê Rayberê Şarê Kurdî Abdullah Ocalanî, binpaykerdişê heqan yê zîndanê bînan zî dewam kenê. Bi taybetî rewşa tepişteyanê nêweşan muhîm a, heto bîn ra zî bi rayîrê Heyetê Îdarî û Çimdarî de poşmanî tepişteyan rê yeno ferzkerdiş û înfazê înna yeno taloqkerdiş. Goreyê dayeyê peyîn yê ameyê eşkerakerdiş, zîndanan de 651 ci ra giran bi pêroyî hezar û 517 tepişteyê nêweşî est ê. Zîndanê Tîpê R, de tepişteyê nêweşî heqê xo yê dermankerdişî rê bêpar manenê.

 

Babete ser o Hemsereka Şaxa Komeleya Heqê Merdiman (ÎHD) ya Îzmîrî Zîlan Gumuş qisey kerd û dîyar kerd ke ganî tepişteyê nêweşî lezkî bêrê veradayîş.

 

'Polîtîkayê tecrîdî yenê kerdiş'

 

Zîlan Gumuş dîyar kerd ke hem Tirkîya hem zî dinya de heqê merdiman tewr zêde yenê binpaykerdiş zîndan ê û va: "Ma sey Komeleya Heqê Merdiman semedê wedaritişê binpaykerdişê heqan yê zîndanan û mexdûriyetê zîndanan werte wedarnê û rayapêroyî şîyar bikerê. Zîmdanê ke Tirkîya de ameyê awankerdiş, bi polîtîkayê tecrîdî yenê îdarekediş û tepişteyî uca yenê tecrîdkerdiş. Zîndanê ke awan kerdê; YGC, Tîpa Y, Tîpa S, bi temamî polîtîkaya tecrîdî taqîb kenê û tepişteyî hem zereyê ci de û hem teberê ci de yenê tecrîdkerdiş.”

 

'Yê ke raporê ATK'yî hazir kenê rewşa zîndanan nêzanê'

 

Zîlan Gumuş dîyar kerd ke goreyê dayeyê peyîn zîndanan de hezar û 517 tepişteyê nêweşî est ê û 651 ci ra nêweşê giran ê û Zîlan Gumuş wina dewam kerd: "Goreyê dayeyê ke wezaretî bi xo munaqeşeyê butçeyê serra vîyarte de eşkera kerd, 709 tepişteyan semedê sebebê cîya zere de dinyaya xo bedelnayî est ê. Ancî ma derheqê tepişteyanê nêweşan de ma her tim vanê ke ganî lezkî înfazî bêrê vindarnayîş û tepişteyî serbest bêrê veradayîş û tewr tay tedawîya înan keyeyan dir dewam bikero. La astengîyê tewr pîl yê hemverê nê de raporê Sazgehê Tipê Edlî (ATK) yo ke vanê eşkenê zîndan de bimanê. La çi heyf kesê ke nê qeraran danê, rewşa zîndanan nêzanê.”

 

'Ganî lezkî zîndanê asayîşê berzî bêrê padayîş'

 

Zîlan Gumuş tewr peyîn wina va: "Ma fikrîyenê ke ganî cezayê tepişteyan bi hawayêk goreyê rûmetê merdimayî bêrê caardiş. Yê ke tewr zêde nê zîndanan de mexdûr benê, helbet tepişteyî nêweş ê. Eke kesêk nêweş bo zî wexto ke keweno nê zîndanan, demêk zaf kilm de xeylêk nêweşî înan rê peyda benê. Semedo ke heqê merdiman demêk zaf kilm de yenê binpaykerdiş. Ma fikrîyenê ke ganî lezkî tepişteyê nêweşî bêrê veradayîş. Nê tewir zîndanî ke goreyê merdiman nîyê, lezkî bêrê padayîş û cezayê merdiman goreyê rûmetê merdiman bêrê caardiş.”