Pelşîn Çetînkaya

 

AMED - Aktîvîsta TJA’yî Çîmen Fîdan derheqê ‘Rayîrşîyayîşê aştîya komelî’ ke do TJA 31ê gulane de bikero qisey kerd û va, ganî cinî her hetî de hemverê şîdetî de wareyan de cayê xo bigîrê û vengê xo berz bikerê. Çîmen Fîdan cinîyan dawetê rayîrşîyayîşî kerd û va, ganî pêro cinî vajê, “ma zî est ê".

 

Têgêrayîşê Cinîyanê Azadan (TJA), 31ê gulane de Meydanê Şêx Saîdî yê qezaya Sûrî ya Amedî de saete 16.00ine de bi tewrbîyayîşê hezaran cinîyanê Kurdistan û Tirkîya do ‘rayîrşîyayîşê aştîya komelî’ pê bîyarê. Cinî hemverê qetilkerdiş, şîdet, astengkerdişê azadîye û pêro problemê komelî kuçeyan de vengê xo berz kenê, na rey zî 31ê gulane de Meydanê Şêx Saîdî de do rayîrşîyayîşê ‘cinî tîya yê’ pê bîyarê.

 

Aktîvîsta TJA’yî Çîmen Fîdan derheqê rayîrşîyayîşo ke do bi hezaran kesî tewr bibê de qisey kerd.

 

Cinî do semedê aştî û çareserîya demokratîkî rayîr ra şêrê

 

Çîmen Fîdan dîyar kerd ke do 31ê gulane de cinî semedê aştî û çareserîya demokratîke rayîr ra şêrê û va: “TJA’yî derheqê nê de konferans viraştî. Erxto ke konferans pê ame ewilî azadîya fîzîkî ya Rayberê Şarê Kurdî Abdullah Ocalanî ame munaqeşekerdiş.  Demêk verê Amed de yadkerdişêk ame organîzekerdiş. Cinîyan serkêşîya nê kerd û dayîkê aştîye zî serkêşîya rayîrşîyayîşî kerdî. Cinîyan semedê cuyêka têduştî têkoşîn kenê. Têkoşînêk cinîyan ê hemverê desteştişî, qirkerdişî est o. Bi vengdayîşê 27ê sibate de ameyo kerdiş de ame dîyarkerdiş ke cinî do hêzê pêşeng bikerê. Bêşik no tena cinîyanê kurdan eleqedar keno. Tirkîya ra heta Kurdistan pêro hetan eleqedar keno.”

 

‘Cinî pêro wareyê têkoşînî de merkez de yê’

 

Çîmen Fîdan dewam de wina va: “Xebatê do taxe, kuçe, qeza û dewan heta 31ê gulane dewam bikero. Komeleyê cinîyan, rêxistinê komelê sivîlî xebatan de ca gênê. Em bawer kenê ke do pêro cinî hetê demokrasî de nê xebatan de ca bigîrê û a roje tewr bibê. Rolo ke kapîtalîzm û netew dewlet cinîyan rê bar kenê werte de yo. La cinîyan tu wext peyser game nêeşta. Bi setran o semedê cuyêka têduşt û azade her cayî de têkoşîn kenê. Na çarçewa de proses mûnenê. Cinî esas de wareyê têkoşînî de merkez de yê.”

 

‘Ganî pêro cinî ware de bê’

 

Çîmen Fîdan tewr peyîn wina va: “Saate 16.00ine de ma do Meydanê Şêx Saîdî bêrê têhet. Rayîrşîyayîş uca dest pêkeno. Ma paweyê pêro cinîyanê Kurdistan û Tirkîya yê. Ma venga pêro ciwan, aktîvîst, ekolojîst, roşnvîr, hunermendan kenê. Ganî hemverê bêhuqûqî meydan de bê. Stenbol ra bigîrê heta Şirnex, Anqara ra bigîrê heta Colemêrg, ameyîşê cinîyan xeylêk muhîm o. Ma pêro cinîyan 31ê Gulane de meydanê Şêx Saîdî de pawenê.”