STENBOL - Dayîkê Şemeyî yê çalakîya xo ya 1052ine pê anê vatî, “Çend serrî zî derbaz bibê, ma do semedê Mehmet Selîm, Hasan, Cezayir Orhan û pêro vînîbîyayeyanê xo edalet biwazê û bîyarê vîr ke ganî dewlete goreyê mîqyasê huqûqê gerdûnî têbigêro.”

 

Dayîkê Şemeyî/Merdimê Şemeyî ke her hewte Meydanê Galatasarayî de kom benê û aqûbetê merdimanê xo yê ke destbendkerdiş de ameyî vînîkerdiş, yan zî ameyî qetilkerdiş bipersê, ameyî têhet û semedê kerdoxî bêrê muhakemekerdiş, çalakîya xo ya 1052yîne organîse kerdî. Xeylêk avûkatê heqê merdiman beşdarê çalakî bî, qerenfîl û fotografê merdimanê xo yê wextê destbendkerdişî de ameyî vînîkerdiş, wedarnayî. Çalakî de aqûbetê Mehmet Selîm, Hasan û Cezayîr Orhan yê 31 serrî verê destbendkerdişî de ameyî vînîkerdiş, persayî. Eşkerayîya çapemenîye hetê merdimê vînîbîyayeyan  Besna Tosun ra amî wendiş.

 

‘Bêvengî hemkarî ya’

 

Besna Tosun, wina qisey kerd, "Ganî perdeyê dûmanî yê binpaykerdişê heqê merdiman yê verî bêro wedaritiş û raştî bêro roşnkerdiş û berpirsyarî bi prosesê hukmî yê bi tesîr bêrê cezakerdiş. Tena bi nê rengî vernîya reynabîyayîşê sûcê bi nê rengî eşkenê bêrê padayîş. Pêwa pêro astengiyan zî ma kesê ke destbendkerdişî de ameyî vînîkerdiş bi çalakîyê ke her serre çarçewaya têkoşînê ma yê aştîye de zêdeyêr yenê kerdiş, anê vîr. Bi vengêk berz pawitişê heqîqetî, resnayîşê edaletî û cuya mîyanê aştîye de wezîfeyê ma yê hem semedê yadkerdişê vînîbîyayeyan û hem zî semedê ameyoxê komelî yo.”

 

Çalakî bi dayîşê qerenfîlan meydanê dorpêçkerde peynî bî.