Rabîa Onver

 

COLEMÊRG - Îdareyê DEM Partîya ya Geverî Gulîzar Îlîş derheqê kombîyayîşê şarî yê çarçewaya ‘prosesê aştî û komelê demokratîkî’ yê DEM Partî dayo destpêkerdiş de qisey kerd û va: “Heta azadîya serekê ma pê nêro manaya gamê ke yenê eştiş zî çin o. Bala ma pêrûne gamanê dewlete ser o ya.”

 

Badê vengdayîşê ‘aştî û komelê demokratîkî’ ke Rayberê Şarê Kurdî Abdullah Ocalanî kerd, semedê çareserî gamê cîya ameyî eştiş. DEM Partî,DBP û TJA tewr tay 140 merkez de ‘pêvînayîşê aştî û komelê demokratîkî yê şarî’ pê ardî. Yek cayo ke pêvînayîş ame kerdiş Geverê Colemêrgî bi. Taxe, dewe û zozanê Geverî nêzdîyê 30 kombîyayîşî ameyî kerdiş.

 

Îdareya DEM Partî ya Geverî Gulîzar Îlîş, derheqê kombîyayîşê şarî de erjnayîş kerd.

 

‘Tu serkewtiş bêbedel nêbeno’

 

Gulîzar Îlîş dîyar kerd proses bi serkêşîya Abdullah Ocalanî ameyo destpêkerdiş û va: “27ê Sibate de vengdayîş ame kerdiş û xeylê gamê yew hetî ameyî eştiş. Nê prosesî de ma bi serek û partîya xo bawer ê û nê semedî ra hêvîya ma est a. 2013-2014ine de zî gamî ameyî eştiş la tesîrêk cîya awan kerdî. Gamê bi asayîş û pozîtîf nêameyî eştiş. PKK’yî dimayê vengdayîşê Abdullah Ocalanî çeke vera da. Têkoşînêk 50 serrî dewam keno est o. Tu serkewtiş bêbedel nêbeno. Ma nê her cayî de vanê.”

 

‘Ma proses qisey kenê û munaqeşe kenê’

 

Gulîzar Îlîş dîyar kerd PKK’yî dimayê vengdayîşî xeylêk gamî eşt ê û dewlete hema gamêke nêeşta û va: “Fikrê şarî bi pêroyî no yo ke dewlete polîtîkaya meşgulkerdişî kena. Dimayê vengdayîşê Birêz Ocalanî ma pêvînayîşê şarî kerd. Pespektîfêk ame pêşkêşkerdiş û xeylêk sername estbî. Ma nê perspektîfî dewe, taxan şarî dir munaqeşe kenê.”

 

‘Her pêvînayîş hêz dano ma’

 

Gulîzar Îlîş wina peynî ard: “Pêvînayîş bi tewrbîyayîşêk xurt ê cinî û ciwanan pê yeno. Pêvînayîşî xurt derbaz benê. Serkêşîya prosesî do cinî û ciwanî bikerê. Hêvî û moralê înan pîl o. Ma nê pêvînayîş de dî. Şar vano, ‘serekê ma no proses girewto milê xo ser ma zî kîşte ey de yê.’ Her pêvînayîşêk hêz dano ma. Gever de bedelê pîlî dayê. Pêwa nê bedelan aştî wazenê. Destek danê proses. La çimê ma pêrûne gamê somut yê dewlete yê.”