QERS - Kesê ke Qirkerdişê Dîgorî de dinyaya xo bedelnayî, serrgêra 32ine ê qirkerdişî de bi çalakîyêke ameyî yadkerdiş.

 

17 kesê ke 14ê Tebaxa 1993ine de qezaya Dîgorê ya Qersî de wexto ke hemverê ferzkerdişê qorîcîtî, ambargoyê werd û sereştişê keyeyan protesto kerdêne, hetê leşkeran ra ameyî kiştiş, serrgêra 32ine ê kiştişê înan de ameyî yadkerdiş. Yadkerdişo ke hetê Partîya Têduştî û Demokrasî (DEM Partî) cayê qirkerdişî de ame organîzekerdiş, endamê Pawitoxê Heqê Merdiman (ÎHD), Komeleya Huqûqnasê Azadîwaştoxan (OHD), Konfederasyonê Sendîkayê Karmendê Gelemperî (KESK), rêxistinê bajar û qezayan ê DEM Partî, Parlamenterê DEM Partî yê Îdirî Yilmaz Hun û xeylêk kesê bînî beşdar bî.

 

'Ganî dewlete bi sûcê xo yê hemverê şarê kurdî dir rî bi rî bo'

 

Yilmaz Hun merasîmê yadkerdişî de qisey kerd û va, "32 serrî verê tîya qirkerdişêk pê ame. Dewijê dewanê girêdayeyê Dîgorî de ciwîyenê, semedê protestokerdişê zilm û zordarî ê wextî û ferzkerdişê qoricîtî rayîrşîyayîşêk kerd. Goreyê qeydê fermî 17 kesî ameyî kiştiş. Qirkerdişê Dîgorî de tu kes nêame muhakemekerdiş û sûcdarî azad mendî. Demêk ke qalê aştî û dayîşûgirewtişî yeno kerdiş, ganî dewlete bi sûcê xo yê hemverê şarê kurdî de rî bi rî bo. Ma ancî vanê ke ma do tu wext kesê ke tîya ameyê kiştiş, xo vîr ra nêkerê."

 

Bername bi dayîşê qerenfîlan cayê qirkerdişî yê semedê 17 kesan peynî bî.