AMED - Dayîka tepişteya bi nameyê Melek Çelîk, Sultan Çelîk, hetê polîsê maskeyînan ra îşkence dî. Sultan Çelîk ke semedê gerrekerdişî şî qerekole cewabê, "Ma nîyê, ê çete yê" girewte. Sultan Çelîk wina va: "Qey çete bi panzêran yenê keye?"

 

Dayîka tepişteya bi nameyê Melek Çelik ke zîndanê Cinîyan ê Bunyanî yê Kayserî de tepişte ya, Sultan Çelîk 3yê Tebaxe de hetê polîsê rîyê înan girewte ke bi wesayîtê zirxî şî verê keyeyê aye, verê berî de îşkence kerdî. Sultan Çelîk ke nasnameyê înan waşt, nasname nêmojnayî û ci ra vatî, wesayît rê espar bibe. Sultan Çelîk ke nê red kerd dima ra waştî keyeyê aye de cigêrayîş bikerê. Sultan Çelîk qerarê cigêrayîşî waşt û polîsan reyke bîn şîdet kerd. Sultan Çelîk roja ke hedîse pê ame şî qerekol û cewabê "Ma nîyê ê çete yê"’ girewt. Sultan Çelîk ke tu netîceyêke nêgirewte û agêra keye, dîyar kerd ke asayîşê canê aye çin o.

 

Sultan Çelîk îşkenceyo ke hetê polîsan ra dî qal kerd.

 

‘Di polîsê sivîlî, panzer û polîsê maskeyînî ameyî keyeyê mi’

 

Sultan Çelîk dîyar kerd ke aye ver bi baxçeyê xo şîne û polîsî ver bi keyeyê aye de ameyîne û wina va: “Blokê B persayî. Ez vinderta. Mi zanayîne yenê keyeyê mi. Rîyê înan de maske bî. Mi nêzanayîne kam ê. Di heb tena sey polîsan bî. Panzer zî verê berî de vindertêne. Mi va, şima çira ameyê? Vatî Meleke zîndanê Kayserî ra fîrar kerda. Hewl dayî ber abikerê. Mi va, çîyêk winasî çin o. Mi va, di saetan de senî ameya tîya? Mi va kesêke fîrarî senî eşkena bêro keyeyê xo de roşû. Mi girewtî û eştî. Vatî, esparê wesayîtî bibe. Mi va, ez espar nêbena.”

 

‘Kênaya mi ra vatî, ma do îşkence dayîka to û birayê to bikerê’

 

Sultan Çelîk dîyar kerd ke hewteyêk îşkence kênaya aye rê kerdê û wina va: “Kênaya mi ra vatê, ma do îşkene dayîke û birayê to rê bikerê. No vatiş ame vîrê mi û ez korîdor ra vejîyaya. La vernîya mi girewtî, kaxidê mi dirnayî. Ez şîya edliye verê dozgerî. Dima ra mi şirawitî qerekol. Vatî, şore do vejîyo kam ci qerekolî ra ameyê.”

 

Qey çete bi panzêran yenê keye?

 

Sultan Çelîk dîyar kerd roja bîn şîya hîrê qerekolê Kayapinarî û wina va: “Qerekolan vatî ma nîyê. Mi va, ê çara ameyê o wext? Înan va, ê çete yê. Mi va, çete bi panzêran yenê verê beran. Mi va, wexto ke ameyî ez baxçeyê xo de bîya. Mi va, îşkence bimi kerdî. La înan va, qetî ê nîyê, çete yê. Ez şîya qerekolê verî yê kênaya mi tepişnabî. Mi rewşe va. La înan va, ma qetî nuşte nêdayo qerekolan û vatî, Meleke di aşmî yo zîndanê Kayserî de tepişte ya. Roja bîne ez ancî şîya dozgerî. Dozgerî zî va, kam bêro ber ameke. Nê çete yê. Mi va madem çete yê, nê çeteyê dewlete yê. Mi va, îşkence bimi kerdî.”

 

‘Di polîsê ke rîyê înan akerdebi îşkence kerd’

 

Sultan Çelîk tewr peyîn wina va: “12 kesî bî. Waştî mi esparê wesayîtî bikerê. Mi va, ez nêzana şima kam ê, ez espar nêbena. Sivîlê rîyê înan akerde îşkence bimi kerdî. Nasname nêmojnayî. Ez hende qerekolan de gêraya çîyêk nêkerdî. Vatî, ê çete yê û mi şirawitî keye.”