MÊRDÎN - Kombîyayîşê encumenê Şaredarîya Şemrexî ya aşma teşrîna peyêne de, "Belgeyê Helwestî yê Têkoşînê Hemverê Şîdetê Ser Bingehê Cinsî" bi yewvengî ame qebulkerdiş.

 

Kombîyayîşê encumenê aşma teşrîna peyêne yê Şaredarîya Mêrdînî ya Şemrexî, Salona Kombîyayîşê Meclîsê Şaredarî de virazîya. Hemşaredarî Kudret Uçuk û Hamdin Demir serekîya kombîyayîşî kerdî. Kombîyayîş bi wendişê madeyanê rojeve dest pêkerd û xeylêk xebatê îdareyê herêmî û projeyê derheqê qeza de ameyî munaqeşekerdiş. Dimayê munaqeşeyan, madeyê rojeve yê "Belgeyê Helwestî yê Têkoşînê Hemverê Şîdetê Ser Bingehê Cinsî" bi yewvengî ame tesdîqkerdiş.

 

Şaredarîya Şemrexî bi nê belgeyî soz da ke hem semedê karmendan hem zî semedê welatijanê ke xizmetan gênê, derûdorêk xebate yê şîdet ra dûrî awan bikerê.