RIHA - Waya Rûşene û Atakan Mahîrî ya ke têkoşînê azadîye de dinyaya xo bedelnaye, Hatîce Çoban bale ante ser Prosesê Aştî û Komelê Demokratîkî û va: “Ma surgun bî, ma şehîd da. Ma aştî wazenê. Bi serran o ma semedê aştîye bedelê girdî danê.”

 

Mîyanê 9-25ê kanûna 1978ine de Mereş de hemverê kurdanê elewîyan de qirkerdiş qewimîya û goreyê dayeyê fermî 105, goreyê şahîdan zî bi seyan kesî dinyaya xo bedelnayî û bi hezaran birîndar bî; bi se hezaran keyeyî û kargerî ameyî talankerdene. Bi se hezaran keyeyî erdê xo ra bî surgun û şîyî metropolan. Prosesê qirkerdişî de PKK’yî awankerdişê xo îlan kerdbî.

 

Sultan Çoban (Rûşen) dewa Akdîlî ya qezaya Elbîstanî ya Mereşî de 8 tutan ra yewe ameye dinya. Sultan Çoban şahîdê qirkerdişî bîye û dima ra koçê Îzmîrî de zî nakokîyê sîstemî dir rî bi rî mende. Sultan Çoban 1986ine de tewrê PKK’yî bîye û 28ê gulane 1988ine de dinyaya xo bedelnaye. Birayê aye Îbrahîm Çoban (Atakan Mahîr) 1993ine de tewrê PKK bi. Atakan Mahîr ke endamê Komîteyê Merkezî yê PKK û Konseyê Leşkerî yê HPGyî bi, 11ê tebaxe 2018ine de hêrişê hewayî yê Dêrsimî de dinyaya xo bedelnaye.

 

Waya Sultan Çoban (Rûşen) û Îbrahîm Çoban (Atakan Mahîr) Hatîce Çoban derheqê waya xo û tewrbîyayîşê aye yê PKK’yî de qisey kerde.

 

Nakokî û munaqeşe ciwîya

 

Hatîce Çoban bale ante ser nîjadperestîyê ke keyeyê aye ciwîya û va: “Wendekarê ke Kurdistan ra ameyîne zanîngehe, zehmetîyê girdî antêne. Cîya ameyîne dîyene. Rastê bêtêduştîye ameyîne. Mi kamca çi ciwîyayîne ameyîne waya xo ra vatêne. Rûşene wayîrê hişmendî bî. Ma serê zordarîya kurdan de sohbet kerdêne.”

 

‘Atakan têkoşînê aye ra tesîr bi’

 

Hatîce Çoban va: “Atakan zî Rûşene ra tesîr bi. Atakan arşîvê xo de vatbî: ‘Waya mi verê mi nê barî wedaritbî la resa şehadet. La ez bi barê aye ra barê xo zî wedarnena.’ Atakan têkoşînê Rûşene ra zaf tesîr bi. Ma sey keye nêzanayîne no kar kûr o. Kûrayîya parekerdişê înan ma raya pêroyî ra fehm kerd.”

 

‘Rûşene şehîdê Kurdistanî ya’

 

Hatîce Çoban prosesê ke Rûşene dinyaya xo bedelnaya ard vîr û va: “Keyeya mi zaf xurt bî. Demo ke leşkerî ameyî keyeyê ma û vatî, ‘Ma kênaya to kişte, ma do lajê to zî bikişê.’ Demo ke ma agahîya şehadetê waya xo girewte ma va, ma do dayîka xo senî vajê? La ma îradeyêko zaf xurt dîy. Dayîka mi cinîyêka zaf xurt û xoverdayoxe bî. Demo ke ma agahî da, va;‘Kênaya mi şehîda Kurdistanî ya, ez bi kênaya xo serberz a.’ Rûşene tesîrêk gird serê ma de kerd. Mi aye xeylê hevalanê aye ra goşdarî kerd. Ez musaya ke aye rêçê zaf muhîmî verdayê.”

 

Hatîce Çoban qiseykerdişê xo wina peynî ard: “Ma bi Prosesê Aştî û Komelê Demokratîkî bawer kenê. Ma kurdî aştî wazenê. No tena vatişî de nîyo, ma bi qasê ke bedenê xo bikerê binê kerra nê pawenê. Ma surgun bîyê, ma şehîd da. Ma aştî wazenê. Bi serran o ma semedê aştîye bedelê gird danê.”