Devrîm Findik

 

STENBOL – Îdarekarê DEM Partî derheqê prosesê ‘Aştî û Cimatê Demokratîk’ de qisey kerdî û dîyar kerdî ke pêwa serrêke derbas bîyo dewlete gamêka somut nêeşta û wina va: “Aştîyêka bi rûmet do semedê feydeyê heme şaran bibo.”

 

Vengdayîşê Rayberê Şarê Kurdî Abdullah Ocalanî dir prosesê ‘Aştî û Cimatê Demokratîk’ 27ê Sibate 2025ine de dest pêkerd. Prosesî ser o serrêke derbas beno û hema hetê hukmatî ra gamêka somut nêameya eştiş. Nê prosesî dir pêwa qerarê Dadgeha Destûra Bingehîn hema tepiştiyê sîyasî nêameyê veradayîş û pêwa 6ê Çeleyî de hemverê Kurdê Rojawanî de hetê HTŞî ra hêrişî dayî destpêkerdiş. Sere de dewletê emperyalîstî, Tirkîya piştîdayîşê nê prosesî dayî. Sûrîye de peymanêka ameya îmzakerdiş zî hema Kobanê binê îşxalkerdişî de yo.

 

Îdarekarê Partîya Têduştî û Demokrasî (DEM Partî) derheqê prosesî de qisey kerdî.

 

‘Tepiştiyê sîyasî hema tepişte yê’

 

Hemsereka DEM Partîye ya Şîşlî Zîlan Ozturk bale ant ser prosesê çareserîya verên û wina va: “Bi tecrubeyê ke verê ameyê ciwîyayene, prosesê newe zî parçebîyayîşî dir rî bi rî yo. Nê semedî ra zî prosesê aştîye de hema gamêka somut nêame eştiş. Hema tepiştiyê sîyasî nêameyê veradayîş. Şar bi hêvî bî labelê gamêka qanûnî nêame eştiş. Pêwa qerarê DDB’yî gamî nînê eştiş. No zî bawerî nêdano şarî.”

 

‘Aştîyêka mende semedê heme şaran bi feyde bibo’

 

Îdarekara DEM Partî û verfeka herêma diyîne Derya Goral zî va proses sewîyeya vatişî de mendo û wina ard ziwan: “Ma wazenê netîce bigîrê. Labelê no bi vatişê sîyasî mendo. Pratîk de çîyêk çin o. Ganî prosesê aştîye somut bêro domnayene. Ma sozê aştîyê da şarê Tirkîya. Yewine hêzê ke ma DAIŞî ra paweno têgêrayîşê azadîya kurdan o. Ma hemverê hêrişê destkewtişê cinîyan ser o têkoşîn kenê. Karê cinîyan prosesê aştîye de hîna zehmet o. No zîhnîyet wazeno rêxistinê cinîyan vila bikero. Labelê ma vanê ke aştîyêka bi rûmet do semedê feydeyê ma hemine bibo.”

 

‘Têgêrayîşê kurdî berpirsyarîyê xo ard ca’

 

Endama rêxistinê DEM Partî ya Şîşlî Mukaddes Erdogdu Çelîk zî wina va: “Proses bi vatişê ‘Tirkîyeya bêteror’ yeno tengkerdiş. Dewlete kesê ke înan rê bena muxalîf, hewl dana çin bikero. Nika wazenê her çî teberê sîyasetî de verdê. Bi vurnayîşê rejîmê Sûrîye wazenê waştişê xo pê bîyarê. No tehluke yo, şaran anê hemverê yewbînan. Her çî mojneno ke têgêrayîşê kurdî bi hişmendî nêzdî bî û vernîya pêrodayîşê mîyanê şaran girewto. Labelê hema Kobanê binê ablûqa de yo.”

 

Hemsereka DEM Partî ya Beyoglu Nîsbet Boztaş zî eşkera kerd ke derheqê prosesî de tu averşîyayîş nêvînê û va: “Ez akerde vajî hetê prosesî de ma averşîyayîşêk nêvînê. Tu waştişê ma heta nika pê nêameyo.”