ÎZMÎR – Rozerîn Kalkan a dimayê 10 serrî tepiştişî ameye veradayîş wina va: “Caardişî zêde bîyî. Tedayê psîkolojîkî est ê. Têgêrayîşê ma yê rojane benê babeta cipersayîşî. Zîndanan de tedayê ke sînor û hesabê înan çin o zêde bîyê.”

 

Rozerîn Kalkan 11ê Tebaxa 2016ine de Mêrdîn de sereştişê keyeyan de ameye destbendkerdiş, şaxa TEMî ya Emniyetê Mêrdînî de 9 rojan îşkence ci rê ame kerdiş. Dima ra hetê dadgehe ra ameye tepiştiş. Rozerîn Kalkan 11 aşmî Zîndanê Tîpa E yê Nîgdeyî de hucreyê yew kesî de mende. Temmuza 2017ine de qebûlkerdişê sewqê aye dir şirawitî Zîndanê Şakranî yê Îzmîrî. Rozerîn Kalkan dimayê 10 serrî 9ê Sibate de ameye veradayîş.

 

Rozerîn Kalkan ajansê ma rê qisey kerd.

 

‘Tedayê psîkolojîkî zêde bîyê’

 

Rozerîn Kalkan da zanayîş ke kesê ke 30 serrî tepişte yê est ê û wina va: “Zîndanan de problemî est ê. Prosesî dir tedayê zîndanan zêde bî. Caardişî zêde bî. Tedayê psîkolojîkî yê hîra û giran est ê. Her çî beno sebebê sûcî. Silamdayîş sûc o. Îslam de silamdayîş cayêk muhîm gêno. Labelê zîndanan de semedê nê cipersayîş yenê akerdiş. Sînor û hesabê tedayê psîkolojîkî çin ê. Tepişteyî nê caardişan dir rî bi rî yenê. Destpêkê prosesî ra caardişê wina zêde bîyê. Verê zî estbî. Çalakîyê ma hemverê nê her tim bîyî.”

 

‘Destkewtişê Rojawanî hema binê tehlukeyê de yo’

 

Rozerîn Kalkan eşkera kerd ke prosesê Rojawanî aye xemgîn kerdo û wina dergî da: “Averşîyayîşêk bi heybet est o. Bêguman zor û zehmetî est ê labelê her prosesê aştî û çareserîye de na rewşe est a. Rojawan de destkewtişê ma yê pîlî est ê û nê hema binê tehlukeyê de yê. Nê semedî ra ma ameyî xo ser. Yewîyêke virazîya. Na yewîye zerrî û çimanê ma zî qîm keno. Ez şarê Rojawanî silam kenê. Heme hevalanê xo yê uca, şarê kurdî silam kena. Vatişêk serekî est o. Vano ‘Ez seserre zî lingan ser o bêrî vindarnayîş, dest hişmendî û ruhê xo ra veranêdana.’ Ganî ma bi nê perspektîfî biewnê prosesî ra. Ewro her kes bi qerar û israr zîndanan ra vejêno. Rojawan û Venga Aştî û Cimatê Demokratîk eynî roşnayî de rayîr ra şinê. Sey ke mi va ma zaf zehmetî û zorî dîyo û ma zanê. Ma hema zêdeyêr benê wayîrê îrade, qerar û bawerî.”

 

‘Ma bi perspektîfê serekî têkoşîn domnenê’

 

Rozerîn Kalkan dîyar kerd ke zîndan wareyêk serekî yo û wina va: “Ganî no nêro xovîrrakerdiş. Ez ewro bi giranîya nê û berpirsyarîya nê vejêna. Bi rastî ez nê heqîqetî temsîl kena? Ez wazena her heval bi nê hişmendî vejîyo û bi nê hişmendî bêro pêşwazîkerdiş. Ganî têkoşînê hevalan, şarê kurdî bêro dîyayene. Ma her wareyî de têkoşînê rûmetî danê. Her keso tepişte şervanê rûmetî yo. Ma heme bi nê perspektîfê serekî têkoşîn domnenê. Semedê nê ganî zêdeyêr têkoşîn bêro dayîş. Ez serekî silam kena. Silamê hevalan heme şarê kurdî û şarê Rojawanî rê est o.”