WAN - Çalakîkera TJAyî Yildiz Çetîn dîyar kerd ke serkêş û merkezê prosesî cinî yê û wina va: “Şertê xoresnayîşê cimatê demokratîk îrtîbatê azad, têduşt û demokratîk ê cinîyan dir ameyo awankerdiş o. Senîn ma 8ê adare tacdar kerd, ma do Newroze zî tacdar bikerê.”

 

Vengê “Aştî û Cimatê Demokratîk” ê ke Rayberê Şarê Kurdî Abdullah Ocalanî 27ê sibata 2025ine de kerdibî, yew serre pey xo de verda, la pêwa nê îqtîdar hema derheqê prosesî de gamêk somut nêeşt û heqê hêvîye bica nêano. Derheqê caardişê qerarê heqê hêvîye Dadgeha Heqê Merdiman a Ewropayî (DHME) de vengî yenê dayîş û bi taybetî cinî bi hawayêk xurt wayîrê prosesî vejîyenê. Cinî sey merkez û serkêşanê prosesî yenê dîyayîş û na mesele de rêxistinê cinîyan xebatê xo domnenê.

 

Çalakîkera Têgêrayîşê Cinîyanê Azadan (TJA) Yildiz Çetîn bale ant prosesê “Aştî û Cimatê Demokratîk” û rol û mîsyonê cinîyan ê prosesî de ercna.

 

‘Ma serkêş û merkezê prosesî yê’

 

Yildiz Çetîn dîyar kerd ke proses hetê şarî ra bi bawerî, pabebîyayîş û hêvîyêk pîl ameyo pêşwazîkerdiş û wina va: “Tewr zaf cinî wayîrê vengdayîşî vejîyayî. Bi serran cinî hetê hişmendîya serdestê mêrdan ra wareyê cuye ra yenê dûrvistiş û heqê înan yenê binpaykerdîş. Cinî hemverê nê de bi serran têkoşîn kenê. Ma çarçeweya paradîgmaya azadîya cinîyan de bi serran semedê cuyêk têduşt têkoşîn kenê. Ma serkêş û merkezê prosesî yê. Pabebîyayîşê ma cinîyan ê prosesî ra zaf pîl ê.”

 

‘Wa heqê hêvîye bêro naskerdiş’

 

Yildiz Çetîn va ke şarê kurdî bi serran têkoşînê aştîye dano û wina va: “Ganî lezkî proses netîce bibo û gamê somutî bêrê eştiş. Ganî qerarê DHMEyî yê heqê hêvîyeyê ke derheqê Abdullah Ocalanî de ameyo dayîş bêro naskerdiş. Ganî semedê ke muxatabê prosesî Birêz Ocalan bo, heqê hêvîye bêro naskerdiş. Çîyê ke kewt milê kurdan ser o, kerdî. PKK xo fesh kerd û çekan verda. Na cografyayî ra ancîya. Zaf gamê somutî ameyî eştiş. La dewlete hema gamêk nêeşta.”

 

‘Do bi hêzê cinîyan cimatê demokratîk bêro awankerdiş’

 

Yildiz Çetîn bale ant “eşkerayîya cinîyanê azadan” ya ke Abdullah Ocalan 8ê adarî de pêşkêşê cinîyan kerd û wina ard ziwan: “Birêz Ocalan 8ê adare de cinîyan rê mesaj şirawit. Cinî azad nêbê, cimat zî azad nêbeno. Şertê xoresnayîşê cimatê demokratîk îrtîbatê azad, têduşt û demokratîk ê cinîyan dir ameyo awankerdiş o. Cimatê demokratîk do bi hêzê cinîyan bêro awankerdiş. Senîn ma 8ê adare tacdar kerd, ma do Newrozî zî tacdar bikerê. Ma do semedê cuyêk têduşt, azad û aştîyane meydanê Newroze awan bikerê.”