STENBOL- Keyeyê Dîlan Karaman derheqê mergê kênaya xo de eşkerayî da. Waya Dîlanê Gonul Karaman dîyar kerd ke ey wazenê ke heqîqet vejîyo meydan û heta ke edalet bi ca bêro do têkoşînê xo bidomnê û vat: “Ma vanê ke rapor de zaf çîyê kemî estê. Çîyêke rast nîyê ameyê nuştene. Ma persenê; Mazlum Toprak çi rê ame veradayene?”

 

Dîlan Karaman 11ê teşrîna peyêne 2025î de badê hewldayîşê xokiştene Amed de ameya tedawîkerdene û dimayê 10 rojan cuya xo ra bîye. Badê mergê Dîlan Karamane mîyanê raya pêroyî de xeylê îdia û munaqeşeyê virazîyayê. Komîsyonêke rêxistinanê cinîyan pê ameyene cigêrayîş kerdbî û çendeyêk vernîya nikayî raporêk raya pêroyî rê pare kerdbî. Rapor ser o munaqeşe û analîzî zêde virazîyayî û raporî vengvetîşêk girs mîyanê raya pêroyî de viraşt. Xeylê kesî vera raporî vejîyayê. Netîceyê îtîraz û nêrazîbîyayîşan de rapor apey ame antene.

 

Sewbîna zî xeylê kesan waşt ke derheqê Parlamentera DEM Partî yê Mêrdînî Salîha Aydenîz ke Dîlan Kahramanê şêwirmenda aye bî zî cipersayîş bêro destpêkerdene. Netîceyê nêrazîbîyayîşan de DEM Partî derheqê Salîha Aydenîz de cipersayîş da destpêkerdene.

 

Keyeyê Dîlan Karaman serê nê averşîyayîşan û çîyêke qewimîyayê banê Şûbeyê Komeleya Heqanê Merdiman (ÎHD) ê Stenbolî de eşkerayî da çapemenî. Waya Dîlanê, Gonul Karaman û rayber û endamê ÎHD’yî tewrê eşkerayî bîyê.

 

Verî cû Endama Komîteya Rayberîya Merkezî yê ÎHD’yî Eren Keskîn qisey kerd û vat: “Ma dinyayêka camerdperest de ciwîyene. Têgêrayîşê cinîyanê kurdî vera naye xeylê xover danê. Dîlane zî înan ra yew bî. Têkoşînê Dîlane zaf zêde tesîr serê şarî de kerd ke ewro hende yeno qisey kerdene. Dîlanê şîdetê serê cinîyan de yeno kerdene, mojna ma. Badê mergê Dîlanê komîsyon ame ronayene, dimayê raporî ra zaf averşîyayîş û munaqeşeyan dest pêkerd. Ma zî mîyanê nê munaqeşeyan de pê zaf çîyan hesîyayê. La nê prosesî de şîdetê camerdî sero nêame qisey kerdene. Waya Dîlanê xora wekalet da ma. Ma do pey şopa dewaya Dîlane de bê.”

 

Waya Dîlanê, Gonul Karaman zî dîyar kerd ke ewro ey senî ke Dîlane aye reyde bîya do qisey bikero û wina vat: “Ma ewro seba heqîqet vejîyo meydan îta yê. Badê mergê Dîlane 5 sazgehan bi hemkarî rapor hedre kerd. Keyeyê Dîlane heta rapor ame amadekerdene bêveng mend, La raporî de ma dî ke kiştox nêameyê eşkerakerdene. Ma zî waşt rapor apey bêro antene. Ma vanê ke rapor de çîyê kemî estê. Çîyêke rast nîyê ameyê nusîyene. Dîlane mîyanê xebatan de ca girewt kede da.”

 

Gonul Karaman dîyar kerd ke Dîlane 11ê teşrîna peyêne saete 05:19 de mesaj aye rê erşawit û tede vato, “Mazlum da mi ro ez keye ra eşta.” Gonul Karaman dewamê qiseyê xo de nê çî îfade kerdî: “Dîlane vat seba ke ez keye ra vejîya pereyî lazimê. Ma mesaj saete 06: 30 de dî û tira vat ‘keye ra vejîye’ û ma aye rê pere erşawit. Badê ra wexto ke Dîlane seba pisinga xo keye ra bigîro agêrena keyeyê Mazlumî. La Mazlum reyna Dîlanê tehdîd keno. Dîlanê ra vato, ‘dîmenê to mi hete estê, ez o to rezîl bikerî.’ Tewr peynî de keyeyî saete 14:42 de Dîlane reyde qisey kerdo. Mazlum Toprak saete 17:22 de ro hevalanê Dîlanê gêrayo û vato, ‘Dîlane întîhar kerdo’ wexto ke Mazlum Toprak şîyo nêweşxane hevalanê Dîlane vera Mazlumî reaksîyon dayo mojnayene. Mazlum Toprak ame destbendkerdene la badê îfadeyan ame veradayene. Ma persenê; Mazlum Toprak çi rê ame veradayene? Ma wazenê ke heqîqet vejîyo meydan, heta ke edalet bêro caardene ma do têkoşînê xo dewam bikerê.”

 

Avûkatê keyeyê Karamanî, Jiyan kaya zî ard ziwan ke wexto ke înan dosya dîya fehm kerdo ke xeylê çîyê kemî tede estê û wina vat: “Nameyê ekîbê weşîye mîyanê dosya de çinîkê. Îfadeyê Mazlum yê dosya de yê yewbînî nêgînê, no zî dîyar ê ke Mazlum rast nêvano. Keso bi nameyê sidki zî îfadeyê ey nêameyê girewtene. Mazlumî bi çek Dîlane tehdîd kerda la dosya de no zî çinîyo. Dosya de tena dîmenê ambulanse estê., ma nêzanê ke vernîya serebûtî de Dîlane ser o şîdet ameyo kerdene yan ney.